काठमाडौं । प्रतिनिधिसभाले संसदीय सुनुवाइ समितिको सदस्यमा नेपाली कांग्रेसका सांसद रामहरि खतिवडाको नाम अनुमोदन गरेको छ ।
शुक्रबार बसेको प्रतिनिधिसभा बैठकमा उपसभामुख इन्दिरा रानाले सभामुखको आसनबाट कांग्रेस सांसद ईश्वरीदेवी न्यौपानेको स्थानमा खतिवडालाई समितिको सदस्य बनाउने प्रस्ताव प्रस्तुत गरेकी थिइन् । सो प्रस्तावलाई सदनले सर्वसम्मत अनुमोदन गरेको हो ।
यससँगै, अब सुनुवाइ समिति सदस्यमा कांग्रेसका रामहरि खतिवडाको नाम औपचारिक रूपमा स्वीकृत भएको छ ।
यसअघि खतिवडा प्रतिनिधिसभा अन्तर्गतको राज्य व्यवस्था तथा सुशासन समितिका सभापति थिए । उनले उक्त पदबाट राजीनामा दिएपछि रिक्त स्थानमा कांग्रेसकै सांसद ईश्वरीदेवी न्यौपाने निर्वाचित भएकी हुन् ।
न्यौपाने पहिले सुनुवाइ समितिको सभापति रहेकी थिइन् । तर, राज्य व्यवस्था समितिको सभापति बनेसँगै उनी सुनुवाइ समितिबाट स्वतः हटेकी हुन् । त्यसैले उनको स्थानमा खतिवडालाई सदस्यमा नियुक्त गरिएको हो ।
प्रकाशित मिति: १३ भाद्र २०८२, शुक्रबार
प्रतिक्रिया