काठमाडौं । नेपाली कांग्रेसको केन्द्रीय कार्यसमिति बैठक सुरु हुनुअघि सानेपास्थित पार्टी केन्द्रीय कार्यालय परिसरबाट प्रहरीले ठूलो मात्रामा लठ्ठी बरामद गरेको छ।
मंगलबार बिहान सुरक्षाको जिम्मेवारीमा खटिएको प्रहरीले कार्यालयको विभिन्न स्थानमा लुकाइएका लठ्ठीहरू फेला पारेको पुष्टि गरेको छ। प्रहरीले लठ्ठी कसले र किन राखेको भन्नेबारे अनुसन्धान सुरु गरेको जनाएको छ।
लठ्ठी बरामद भएपछि कार्यालय वरपरको सुरक्षा व्यवस्था अझ कडा पारिएको छ। बैठकमा सहभागी हुने नेताहरूलाई प्रहरीले तलासी गरेर मात्र प्रवेश गराइरहेको छ।
कांग्रेसको केन्द्रीय कार्यसमिति बैठक दिउँसो १ बजेदेखि सुरु हुने तय छ। बैठकमा जेन–जी आन्दोलनपछिको राजनीतिक अवस्था, पार्टीको आगामी रणनीति, महाधिवेशनको मिति, र चुनावी तयारी लगायतका विषयमा छलफल हुने बताइएको छ।
आजको बैठकमा सभापति शेरबहादुर देउवा पनि सहभागी हुनेछन्। भदौ २३ र २४ गते भएको जेन–जी आन्दोलनका क्रममा बुढानीलकण्ठस्थित देउवा निवासमा आक्रमण र आगजनी भएपछि उनी लामो समय सार्वजनिक रूपमा देखिएका थिएनन्। करिब ३५ दिनपछि उनी आज पहिलोपटक पार्टी कार्यक्रममा सहभागी हुन लागेका हुन्।
संभावित भिडन्त वा अवाञ्छित गतिविधि रोक्न पार्टी कार्यालय वरिपरि बाक्लो संख्यामा प्रहरी परिचालन गरिएको छ।
प्रकाशित मिति: २८ आश्विन २०८२, मंगलबार
प्रतिक्रिया