काठमाडौं । नेपाली कांग्रेसका कार्यवाहक सभापति पूर्णबहादुर खड्काले पार्टीभित्र उठेको विशेष महाधिवेशनको मागबारे औपचारिक जानकारी दिएका छन् ।
बिहीबार सानेपास्थित पार्टी केन्द्रीय कार्यालयमा बसेको केन्द्रीय कार्यसमिति बैठक सुरु गर्दै खड्काले महाधिवेशन प्रतिनिधिहरूले विशेष महाधिवेशनका लागि हस्ताक्षर बुझाएको तथ्य बैठकलाई अवगत गराए ।
उनले दर्ता भएको हस्ताक्षरपत्र कांग्रेस विधानअनुसार अध्ययन गरी आवश्यक प्रक्रिया अघि बढाइने बताए । खड्काले विशेष महाधिवेशन माग्ने नेताहरूको मूल उद्देश्य पनि मंसिर महिनाभित्र नै नियमित महाधिवेशन सम्पन्न होस् भन्ने रहेकोमा आफू विश्वस्त रहेको टिप्पणी गरे ।
“मलाई लाग्छ, मागकर्ता साथीहरूको चाहना मंसिर मसान्तभित्र नियमित महाधिवेशन सम्पन्न गर्ने नै हो,’ खड्काले बैठकमा भने, ‘हामी यो बैठक टुंगिँदासम्म समयमै अधिवेशन गर्ने साझा समझदारीमा पुग्नेछौँ ।’
युवा नेता गुरुराज घिमिरेको नेतृत्वमा बुधबार महाधिवेशन प्रतिनिधिहरूले विशेष महाधिवेशन माग गर्दै हस्ताक्षर बुझाएका थिए । हस्ताक्षरकर्ता समूहले विधानमा तोकिएको ४० प्रतिशतभन्दा बढी, अर्थात् करिब ५१ प्रतिशत प्रतिनिधिको समर्थन प्राप्त भएको दाबी गरेको छ ।
कांग्रेस विधान अनुसार, ४० प्रतिशत महाधिवेशन प्रतिनिधिले विशेष महाधिवेशनको माग गर्दै हस्ताक्षर बुझाएमा तीन महिनाभित्र अधिवेशन गर्नुपर्ने व्यवस्था छ ।
पार्टीभित्र यो विषयले नेतृत्व, संगठन र आगामी महाधिवेशन तयारीबारे नयाँ राजनीतिक बहस सुरु गरेको छ ।
प्रकाशित मिति: ३० आश्विन २०८२, बिहिबार
प्रतिक्रिया