काठमाडौं। काठमाडौं उपत्यकाका विभिन्न स्थानबाट चोरी भएका ६५ वटा मोटरसाइकल प्रहरीले खोजी गरी सम्बन्धित धनीलाई फिर्ता गरेको छ ।
काठमाडौं उपत्यका ट्राफिक प्रहरी कार्यालयले आइतबार आयोजना गरेको कार्यक्रममा फेला परेका मोटरसाइकलहरू सम्बन्धित व्यक्तिलाई हस्तान्तरण गरिएको हो ।
कार्यालयका प्रहरी वरिष्ठ उपरीक्षक नवराज अधिकारीका अनुसार विशेष खोज अभियान सञ्चालन गरेर उपत्यकाका विभिन्न स्थानबाट ती सवारी साधन बरामद गरिएको हो ।
उनले सवारी साधन चोरीका घटना न्यूनीकरण गर्न अतिरिक्त सुरक्षा प्रणाली तथा लकिङ प्रविधि प्रयोग गर्न आवश्यक रहेको बताए ।
उनका अनुसार वैशाख महिनामा मात्रै हराएका ६५ वटा मोटरसाइकल खोजी गरी धनीलाई बुझाइएको छ ।
कतिपय सवारी साधन विशेष अनुसन्धान र खोजतलासपछि फेला पारिएको उनले जानकारी दिए ।
प्रहरीले सवारी साधन हराएमा तत्काल प्रहरीलाई जानकारी गराउन तथा पार्किङ गर्दा आवश्यक सुरक्षा सतर्कता अपनाउन सर्वसाधारणलाई आग्रह गरेको छ ।
प्रकाशित मिति: २७ बैशाख २०८३, आइतबार
प्रतिक्रिया