बैंकक। थाइल्यान्डका पूर्वप्रधानमन्त्री थाक्सिन शिनावात्रा जेलमुक्त भएका छन्।
भ्रष्टाचारसम्बन्धी मुद्दामा दोषी ठहर भएपछि कारागार सजाय भोगिरहेका उनी सोमबार औपचारिक रूपमा रिहा भएका हुन्।
७६ वर्षीय शिनावात्राले रिहाइअघि करिब आठ महिना हिरासतमा बिताएका थिए।
बैंककस्थित क्लोङ प्रेम केन्द्रीय कारागार बाहिर उनका सयौँ समर्थक र राजनीतिक सहयात्रीहरू भेला भएर स्वागत गरेका थिए।
समर्थकहरूले नाराबाजी गर्दै खुसी व्यक्त गरे पनि शिनावात्राले सञ्चारमाध्यमसँग कुनै प्रतिक्रिया दिएनन्।
दूरसञ्चार क्षेत्रका सफल अर्बपति व्यवसायीका रूपमा परिचित शिनावात्राले सन् १९९८ मा आफ्नै राजनीतिक दल स्थापना गरेका थिए।
त्यसपछि उनी सन् २००१ मा थाइल्यान्डको प्रधानमन्त्री बनेका थिए।
उनको कार्यकाल विवादरहित भने रहेन। सन् २००६ मा सैन्य ‘कू’ मार्फत उनको सरकार अपदस्थ गरिएको थियो।
त्यतिबेला उनी विदेश भ्रमणमा रहेका कारण स्वदेश फर्कन सकेनन् र लामो समय निर्वासनमा बस्न बाध्य भएका थिए।
थाक्सिनमाथि अधिकारको दुरुपयोग, सरकारी योजनामा अनियमितता तथा आफ्ना व्यावसायिक स्वार्थलाई राज्य संयन्त्रमार्फत लाभ पुर्याएको आरोप लगाइएको थियो।
उनी विदेशमै रहेका बेला अदालतले दोषी ठहर गर्दै सजाय सुनाएको थियो।
लामो निर्वासनपछि उनी सन् २०२३ मा स्वदेश फर्किएका थिए।
अदालतमा उपस्थित भएपछि उनलाई सुरुमा आठ वर्षको जेल सजाय सुनाइएको थियो।
पछि थाइल्यान्डका राजा महा वजिरालोङकोर्नले उनको सजाय घटाएर एक वर्षमा सीमित गरिदिएका थिए।
स्वास्थ्य अवस्थालाई कारण देखाउँदै शिनावात्रालाई जेलको सट्टा बैंकक प्रहरी अस्पतालको विशेष कक्षमा राखेर सजाय भोग्न अनुमति दिइएको थियो।
यस विषयलाई लिएर विपक्षी दलहरूले उनलाई विशेष सुविधा दिइएको भन्दै आलोचना गरेका थिए।
पछि सर्वोच्च अदालतले उनलाई कारागारमै सजाय पूरा गर्न निर्देशन दिएको थियो।
त्यसबीच न्याय मन्त्रालयअन्तर्गतको एक समितिले उनको उमेर, स्वास्थ्य अवस्था, राम्रो आचरण र पुनः अपराध गर्ने सम्भावना न्यून रहेको आधार प्रस्तुत गर्दै प्यारोलमा रिहा गर्ने निर्णय गरेको हो।
रिहाइपछि पनि उनी पूर्ण स्वतन्त्र भने रहने छैनन्। आगामी चार महिनासम्म उनी सरकारी निगरानीमा रहनेछन्।
उनलाई बैंककस्थित आफ्नै निवासमा बस्नुपर्नेछ भने इलेक्ट्रोनिक निगरानी उपकरण लगाउन र नियमित रूपमा सम्बन्धित निकायमा उपस्थित भएर विवरण बुझाउनुपर्ने व्यवस्था गरिएको छ।
प्रकाशित मिति: २८ बैशाख २०८३, सोमबार
प्रतिक्रिया