सिड्नी। अस्ट्रेलियाको अदालतले एलन मस्कको सामाजिक सञ्जाल एक्सलाई बाल सुरक्षा सम्बन्धी अनलाइन नियम उल्लङ्घन गरेको भन्दै ६ लाख ५० हजार अस्ट्रेलियन डलर जरिवाना तिर्न आदेश दिएको छ ।
अदालतले कम्पनीलाई नियामकको कानुनी खर्चबापत थप १ लाख अस्ट्रेलियन डलर पनि तिर्नुपर्ने फैसला गरेको छ ।
एक्सले आफ्नो गल्ती स्वीकार गरेपछि बिहीबार यो फैसला सुनाइएको हो । कम्पनीले ४५ दिनभित्र जरिवाना बुझाउनुपर्ने छ ।
यो मुद्दा सन् २०२३ मा सुरु भएको थियो ।
अस्ट्रेलियाको इन्टरनेट नियामक ईसेफ्टी कमिशनले बाल यौन शोषण सम्बन्धी सामग्री नियन्त्रणमा एक्सले के कदम चालेको छ भनी जानकारी माग्दा कम्पनीले पर्याप्त सहयोग नगरेको थियो ।
न्यायाधीश माइकल ह्वीलहानले ठूलो कम्पनी भएकाले उच्च जरिवाना मात्र प्रभावकारी हुने बताएका छन् ।
एक्स र अस्ट्रेलियाली नियामकबीच बालबालिकाको सुरक्षा, सेन्सरशिप र घटनाका भिडियो हटाउने विषयमा पहिलेदेखि नै विवाद रहँदै आएको छ ।
प्रकाशित मिति: ७ जेष्ठ २०८३, बिहिबार
प्रतिक्रिया