काठमाडौँ । मेटा कम्पनीका प्रमुख उत्पादनहरू फेसबुक र म्यासेन्जरमा शुक्रबार नेपालसहित समस्या देखिएको छ। प्राविधिक समस्या देखिएको भन्दै विश्वभरका प्रयोगकर्ताहरुले रिपोर्ट गरिरहेका छन् ।
शुक्रबार साँझदेखि सुरु भएको यस समस्याका कारण प्रयोगकर्ताहरूको फेसबुक एकाउन्ट स्वतः लग-आउट भएको छ। पुनः लग-इन गर्न खोज्दा ‘अनपेक्षित त्रुटि’ वा ‘केही गलत भयो’जस्ता सन्देशहरू देखिएका छन् । जसले गर्दा प्रयोगकर्ताहरू आफ्नो एकाउन्टमा पहुँच बनाउन असमर्थ भएका छन् ।
फेसबुक र म्यासेन्जरको मोबाइल एप र वेबसाइट दुवैमा यो समस्या देखिएको हो। मेटाका अन्य सेवाहरू ह्वाट्सएप र इन्स्टाग्राम भने धेरै हदसम्म सञ्चालनमा रहे पनि इन्स्टाग्रामको वेब संस्करणमा भने केही समस्याहरू देखिएको रिपोर्ट गरिएको छ।
मेटाले आफ्ना उपभोक्ता उत्पादनहरूको अवस्थाबारे जानकारी दिन कुनै आधिकारिक ‘स्टेटस पेज’ सञ्चालन गरेको छैन भने उसको बिजनेस टूल्स स्टेटस पेजमा समेत यस अवरोधबारे कुनै तत्काल अपडेट दिएको छैन ।
प्रकाशित मिति: २९ जेष्ठ २०८३, शुक्रबार
प्रतिक्रिया