काठमाडौं। विश्वका सबैभन्दा धनी व्यक्ति एलन मस्कको कुल सम्पत्तिमा पछिल्लो एक महिनायता ठूलो गिरावट आएको छ। उनका प्रमुख कम्पनी टेस्ला र स्पेसएक्सको शेयर मूल्यमा आएको तीव्र गिरावटसँगै मस्कको नेटवर्थ उल्लेख्य रूपमा घटेको हो।
टेस्लाले सार्वजनिक गरेको दोस्रो त्रैमासिक वित्तीय प्रतिवेदनमा कम्पनीको नाफा घटेको देखिएको छ। कृत्रिम बुद्धिमत्ता (एआई) र रोबोट्याक्सी परियोजनामा ठूलो लगानीका कारण ‘फ्री क्यास फ्लो’मा नकारात्मक प्रभाव परेको प्रतिवेदनपछि लगानीकर्ताको विश्वास कमजोर बनेको छ। त्यसको असरस्वरूप टेस्लाको शेयर मूल्य करिब १४ प्रतिशतले घटेको बताइएको छ।
यस्तै, हालै अमेरिकी शेयर बजारमा इतिहासकै ठूलो आईपीओमार्फत सूचीकृत भएको स्पेसएक्सको शेयर मूल्यमा पनि उल्लेख्य गिरावट आएको छ। ‘स्टारसिप’को पछिल्लो परीक्षणमा देखिएको प्राविधिक समस्या र विश्वव्यापी प्रविधि क्षेत्रको मन्दीका कारण कम्पनीको शेयर मूल्य करिब २५ देखि ३० प्रतिशतसम्म घटेको जनाइएको छ।
स्पेसएक्सको आईपीओपछि जुन महिनाको मध्यतिर एलन मस्कको कुल सम्पत्ति १.४५ ट्रिलियन अमेरिकी डलरसम्म पुगेर उनी इतिहासकै पहिलो ‘ट्रिलियनेयर’ बनेका थिए। तर, टेस्ला र स्पेसएक्स दुवै कम्पनीको शेयरमा आएको गिरावटका कारण उनको सम्पत्ति एक महिनामै घटेर करिब ७४४ अर्ब अमेरिकी डलरमा झरेको छ।
यसरी एक महिनामै मस्कको सम्पत्तिमा करिब आधा गिरावट आए पनि उनी अझै पनि विश्वकै सबैभन्दा धनी व्यक्तिका रूपमा कायम छन्। हाल उनको सम्पत्ति गुगलका सहसंस्थापक ल्यारी पेजलगायत अन्य अर्बपतिभन्दा उल्लेख्य रूपमा धेरै रहेको छ।
प्रकाशित मिति: ८ श्रावण २०८३, शुक्रबार
प्रतिक्रिया