काठमाडौँ । व्यवसायी दुर्गा प्रसाईँले बैंक तथा वित्तीय संस्थाहरूलाई ‘शत्रु’को संज्ञा दिएका छन् ।
आइतबार काठमाडौँको माइतीघरमा आयोजित एक कार्यक्रममा उनले बैंक तथा वित्तीय संस्थाहरूले साथ दिनेभन्दा पनि शत्रुको व्यवहार गरेको भन्दै आपत्तिसमेत जनाए ।
सर्वहारा वर्गलाई मारमा पार्ने काम गरेकाले आफूले बैंक तथा वित्तीय संस्थाहरूको विरोधमा आन्दोलनको नै सुरुआत गर्नुपरेको उनले जिकिर गरे ।
प्रसाईँले १७ लाख परिवारको घर बैंक तथा वित्तीय संस्थाहरूले लिलामी गर्ने सूचना आफूले पाएको दाबीसमेत गरे ।
“बैंक, लघुवित्त, सहकारीहरूले साथ दिने होइन, शत्रुको रूपमा व्यवहार गर्ने काम भयो,” उनले भने, “आफ्नै घरमासमेत बस्न नदिने अवस्थामा बैंकहरुले पुर्याए । त्यसो भएपछि आफूहरूले आन्दोलन नै सुरु गर्नुपर्यो ।”
प्रसाईँले राष्ट्र, राष्ट्रियता, धर्म-संस्कृति र नागरिक बचाऊ महाअभियान सञ्चालन गर्ने भन्दै काठमाडौँमा शनिबार (हिजो)देखि आन्दोलनको कार्यक्रम सुरु गरेका छन् ।
प्रकाशित मिति: २१ फाल्गुन २०७९, आइतबार
प्रतिक्रिया