पोखरा । उच्च अदालत पोखराले अभिनेता पल शाहलाई बलात्कारसम्बन्धी मुद्दामा सफाइ दिएको छ । पीडित भनिएकी युवतीले नै बकपत्रमा शाह निर्दोश छन् भनेपछि दोषी भन्न नमिल्ने अदालतले जनाएको छ ।
यो मुद्दा उच्च अदालतका न्यायाधीशद्वय डिल्लीराज आचार्य र श्रीधरा कुमारी पुडासैनीको इजलासमा सुनुवाइ भएको थियो । सोही इजलासको पूर्णपाठ सार्वजनिक भएको हो ।
‘निज निर्दोष छन् भन्ने समेत बेहोराबाट बकपत्रमा गरेको देखिन्छ । यसरी जो व्यक्ति पीडित भयो भनी जाहेरी दरखास्त परेको छ र आफू जबरजस्ती करणीको वारदातमा परि पीडित भएको भनी मौकामा कागज गर्दछिन् उनै व्यक्तिले अदालतमा उपस्थित भई आफू पीडित होइन, मेरो बुवाले अरुको उक्साहटमा जाहेरी दिएको र प्रतिवादीबाट कुनै प्रकारको यौन दुरुपयोग नभएको भनी सुरु अदालतमै व्यक्त जाहेरवाला निज पीडित कै पिता र नाबालिकाले बकपत्र गरेको स्थितिमा अभियोग दावी बमोजिमको जबरजस्ती करणीको वारदात भएको भन्न मिल्ने देखिएन,’ आदेशको पूर्णपाठमा भनिएको छ ।
शाहलाई नाबालिकामाथि बाल यौन दुराचार गरेको अभियोगमा जिल्ला अदालत नवलपरासी पूर्वले साढे २ वर्ष कैद र पीडितलाई १० लाख रुपैयाँ क्षतिपूर्ति दिनुपर्ने फैसला गरेको थियो । फैसलाविरुद्ध सरकारी वकिल कार्यालय र शाह दुबै उच्च अदालत पोखरा पुगेका थिए ।
प्रकाशित मिति: १ श्रावण २०८०, सोमबार
प्रतिक्रिया