काठमाण्डाै – महन्थ ठाकुर नेतृत्वको लोकतान्त्रिक समाजवादी पार्टी, नेपालले पालिका चुनावको घोषणा पत्र सार्वजनिक गरेको छ । बबरमहलमा रहेकाे पार्टी केन्द्रीय कार्यालयमा घोषणा पत्र सार्वजनिक गरिएको हो ।
चुनावी घोषणा पत्र सार्वजनिक कार्यक्रममा लोकतान्त्रिक समाजवादी पार्टी, नेपालका नेता राजेन्द्र महतोले चुनावकै मजाक हुनेगरी सत्तारुढ दलहरुले चुनावी गठबन्धन गरेको आरोप लगाउँदै सत्तारुढ दलहरु चुनावमा जाँदा जनताले कुन पार्टी भनेर बुझ्ने ? भनेर प्रश्न समेत गरे ।
देश र दुनियाँले नबुझ्ने गरी सत्तारुढ दलहरुले गठबन्धन गरेर चुनावमा गएको नेता महतोले बताए । उनले भने-‘ चुनावमा जनताले त पार्टीलाई मत दिने हो तर सत्तारुढ दलहरुले गठबन्धनको नाममा चुनाव लडेर गल्ती गरे ।’
नेता महतोले दलीय प्रणालीमा दलहरु आफैँ चुनावमा जाने भएकाले आफ्नो पार्टीले गठबन्धन गरेर जाने विषयलाई महत्त्व नदिएको बताए । उनले पालिकामा आवश्यकताकाे आधारमा अन्य दलसँग चुनावी तालमेल गरेर जाने निर्णय गर्ने अधिकार स्थानीय पार्टीलाई दिइएको समेत उल्लेख गरे ।
घोषणा पत्रमा सबै महिलाहरुलाई निःशुल्क शिक्षा हासिल गर्ने व्यवस्था गर्ने, सार्वजनिक गाडीकाे भाडा निःशुल्क गर्ने, गरिबका लागि नि: शुल्क स्वास्थ्य उपचारको व्यवस्था गर्ने लगायतका योजना उल्लेख गरिएको छ ।
प्रकाशित मिति: १६ बैशाख २०७९, शुक्रबार
प्रतिक्रिया