काठमाडौं । बङ्गलादेशका प्रदर्शनकारीहरूले राष्ट्रपति मोहम्मद साहाबुद्दिनको राजिनामा माग गर्दै राष्ट्रपति भवन ‘बङ्गभवन’ कब्जा गरेका छन्।
मङ्गलबार दिउँसो, ‘एन्टी–डिस्क्रिमिनेशन स्टुडेन्ट मुभमेन्ट’ले प्रधानमन्त्री शेख हसिनालाई अपदस्थ गर्नका लागि ढाकाको केन्द्रीय शहीद मिनारमा र्याली आयोजना गर्दै राष्ट्रपतिको राजिनामा र अन्य पाँच बुँदे मागको घोषणा गरेको थियो।
राति बङ्गभवनतर्फ अघि बढेका प्रदर्शनकारीहरूलाई सेनाले ब्यारिकेड लगाएर रोक्न सफल भएको छ। प्रदर्शनकारीहरूले बङ्गभवनको बाहिर उभिएर राष्ट्रपतिको राजिनामा माग गर्दै नारा लगाएका छन्। “राष्ट्रपति हसिना अधिनायकवादी सरकारका सहयोगी हुन्। उहाँले तुरुन्तै राजिनामा दिनुपर्छ,” एकजना प्रदर्शनकारीले भने।
मोहम्मद साहाबुद्दिन बङ्गलादेशका १६ औं राष्ट्रपति हुन्, र सन् २०२३ को राष्ट्रपति चुनावमा अवामी लिगको मनोनयनमा निर्विरोध निर्वाचित भएका थिए। भेदभाव विरोधी विद्यार्थी आन्दोलनले सन् १९७२ मा लेखिएको संविधान खारेज गरी सन् २०२४ को सन्दर्भमा नयाँ संविधान लेख्न आह्वान गरेको छ।
विद्यार्थीहरूले अवामी लिगको विद्यार्थी संगठनमाथि प्रतिबन्ध लगाउन र सन् २०१८ र २०२४ मा शेख हसिनाको नेतृत्वमा भएको चुनावलाई अवैध घोषणा गर्नुपर्ने माग पनि गरेका छन्। उनीहरूले गणतन्त्रको घोषणा गर्न आह्वान गरेका छन्, जबकि जुलाईमा सरकारी जागिरका लागि आरक्षण प्रणालीको विरोध गर्दै प्रदर्शन भएको थियो।
बढ्दो विरोधको पृष्ठभूमिमा, शेख हसिनाले ५ अगस्टमा प्रधानमन्त्रीको रूपमा राजीनामा दिएपछि बङ्गलादेशमा अन्तरिम सरकारको स्थापना गरिएको छ। हसिनाको राजीनामापछि नोबेल पुरस्कार विजेता मुहम्मद युनुसको नेतृत्वमा अन्तरिम सरकार गठन भएको छ।
प्रकाशित मिति: ७ कार्तिक २०८१, बुधबार
प्रतिक्रिया