काठमाडौं महानगरपालिकाका मेयर बालेन साह आज (शुक्रबार) बिहान नुवाकोटमा रहेको सिसडोल क्षेत्रमा पुगेका थिए ।
लामो समयदेखि काठमाडौंको फोहोर बिर्सजन गर्न नदिएर अवरोध गरिरहेका स्थानीयबासिन्दासँग छलफल गर्न उनी उपमेयर सुनीता डंगोलसहित महानगरको टोली त्यहाँ पुगेका थिए ।
केहीबेर स्थानीयसँगको कुराकानीका क्रममा स्थानीयका कुरा सुनिसके पछि मेयर साहले तत्कालको लागि केमिकल हालेर दुर्घन्ध हटाइने बताए । उनले एक हप्ताभित्रमा दुर्घन्ध हटाइने बताउँदै त्यसका लागि केमिकल लिएर आउने गाडीमा स्थानीयले अवरोध नगर्नको लागी पनि आग्रह गरे ।
स्थानीयसँगको उनको अर्को प्रतिबद्धताको क्रममा फोहोरबाट मल बनाउने सिस्टम जडान गरेर त्यहाँको फोहोरलाई मलमा परिणत गर्ने बताए । ड्रिल गरेर ग्यास निकाल्ने योजना पनि अघि सार्दै यी दुवै कामको लागि कम्तिमा चार महिनाको समय लाग्ने बताए । सिसडोलवासीले फोहोर बिर्सजनमा अवरोध गरेपछि लामो समयदेखि काठमाडौंको फोहोर उठ्न नसकेको विषयमा स्थानीयले राज्यसँग गरेको सम्झौता कार्यान्वयन नहुँदा फोहोर विर्सजन गर्न नदिएको बताएका थिए । फोहोर र मानिसहरू एकै ठाउँमा बस्न नसकिने भन्दै चाँडो भन्दा चाँडो त्यसको व्यवस्थापन गर्न पनि उनीहरुले मेयरसँग आग्रह गरे ।
फोहोर व्यवस्थापनका विषयमा छलफल गर्न मेयर साहले यसअघि बिहीबार सहरी विकासमन्त्री रामकुमारी झाक्रीसँग पनि भेट गरेका थिए । भेटको क्रममा काठमाडौं उपत्यकाको फोहोर व्यवस्थापनको दिगो समाधान खोज्ने विषयमा छलफल भएको थियो ।
मेयरमा निर्वाचित भएसँगै मेयर साह सिसडोल र बञ्चरेडाँडाको अवलोकनका लागि पुगेका थिए । त्यसपछि आज उनी सिसडोल पुगेका हुन् ।उनले काठमाडौंको फोहोर व्यवस्थापन नभएसम्म कुनै पनि उत्सव नमनाउने घोषणा गरेका पनि गरिसकेका छन् ।
प्रकाशित मिति: २० जेष्ठ २०७९, शुक्रबार
प्रतिक्रिया