बिदाइ कार्यक्रममा मन्त्री झाँक्रीको रोदन

काठमाडौं । बालुवाटार पुगेर प्रधानमन्त्री शेरबहादुर देउवालाई राजीनामा बुझाइसकेपछि रामकुमारी झाँक्रीले आफ्नो मन्त्रालयका उपलब्धिबारे जानकारी दिन मन्त्रालयमा पत्रकार सम्मेलन आयोजना गरेकी छिन् ।

मन्त्रीका रूपमा अन्तिम पत्रकार सम्मेलनमा झाँक्री निकै भावुक देखिइन् । उनी लामो समयसम्म कागजमा घोत्लिँदै झोक्राएकी थिइन् । पटक पटक न्यापकिनले आँखा पुछेकोसमेत देखिएको थियो । आँखामा गाजल लतपतिएको थियो । उनको अनुहारमा पूर्ण रूपमा उदासी छाएको थियो भने मुस्कान हराएको थियो ।

मन्त्रालयका कर्मचारीले झाँक्रीलाई खादा लगाएर बिदाइ गरेका थिए । साथै बुद्धमूर्ति उपहार दिए। मन्त्री झाँक्रीले कार्यक्रममा सम्बोधन गरिनन् । उनले आफू बोल्न सक्ने हालतमा नभएको बताइन् ।

प्रकाशित मिति: १२ असार २०७९, आइतबार