काठमाडौं । निर्वाचन आयोगले नेकपा माओवादी केन्द्रका अध्यक्ष पुष्पकमल दाहाललाई स्पष्टीकरण सोधेको छ।

अध्यक्ष प्रचण्डले एक सार्वजनिक कार्यक्रममा सांसद बन्न करोडौं रुपैयाँ खर्च हुने अभिव्यक्ति दिएपछि आयोगले उनलाई पत्र काटेको हो। आयोगले काटेको पत्र हुलाकमार्फत पठाइएको आयोग स्रोतले जनाएको छ।

गत सोमबार एक कार्यक्रममा प्रचण्डले अहिलेको निर्वाचन प्रणालीका कारण भ्रष्टाचार नियन्त्रण हुन नसकेको तर्क गरेका थिए। सांसद बन्न नै करोडौं खर्च हुने भन्दै उनले मन्त्री भएर त्यसको लगानी उठाउने प्रवृत्ति बढेको बताएका थिए।

‘करोडौं खर्च गरेर किन सांसद हुन्छन् भने सांसद नभई मन्त्री हुन पाउँदैनन्। सांसद नभई प्रधानमन्त्री हुन पाइँदैन। मन्त्री र प्रधानमन्त्री हुन करोडौं खर्च गर्नुपर्यो। सांसद भइसकेपछि मन्त्री हुन अनेक खेल खेल्नुपर्यो। मन्त्री भइसकेपछि लगानी उठाउनुपर्यो। भ्रष्टाचार यही प्रणालीभित्र छ,’ उनले भनेका थिए।

गाउँपालिकाकै निर्वाचनमा १० करोड खर्च गरेर जितेको रिपोर्ट आफूले पाएको उनले बताएका थिए। प्रदेश र केन्द्रको निर्वाचनमा अर्ब खर्च हुने संकेत देखिएको प्रचण्डको भनाइ थियो। ‘यो निर्वाचन प्रणालीबाट क्रान्तिकारीले जित्ने त सपना भयो। दलाल पुँजीपति र भ्रष्टाचारी जितेर आउने भए,’ उनले भने।

आन्दोलनको रापताप रहेको २०६२–०६३ ताका माओवादी भनेपछि जसले पनि जित्ने अवस्था रहेको बताउँदै उनले अब भने धेरै पैसा खर्च गर्न नसकेन नजितिने निष्कर्ष आफूले निकालेको बताएका थिए।

गत चैतमा निर्वाचन आयोगले नेपाली कांग्रेसका केन्द्रीय सदस्य शशांक कोइरालालाई पनि चुनावी खर्चसम्बन्धी अभिव्यक्तिबारे स्पष्टीकरण सोधेको थियो। कोइरालाले एक कार्यक्रममा ०७४ सालको प्रतिनिधिसभा निर्वाचनमा आफूले ६ करोड खर्च गरेर निर्वाचन जितेको अभिव्यक्ति दिएका थिए।

प्रकाशित मिति: १२ श्रावण २०७९, बिहिबार

aatmaram khanal

ग्लोबल नागरिक संवाददाता

'हामी जे देख्छौं, त्यही लेख्छौं र देखाउछौं'
सत्य-तथ्य निष्पक्ष ताजा समाचार'

यो खबर पढेर तपाईलाई कस्तो महसुस भयो ?


स्रोतहरू खुलाइएका बाहेक ग्लोबल नागरिकमा प्रकाशित सम्पूर्ण सामग्रीहरू ग्लोबल जर्नालिस्ट ग्रुपका सम्पत्ति हुन् । यसमा प्रकाशित कुनै पनि सामग्रीहरू छापा, विद्युतीय, प्रसारण वा अन्य कुनै पनि माध्यमबाट पुनःप्रकाशन वा प्रसारण गर्नुअघि अनुमति लिनुहुन अनुरोध छ ।

©2024 GlobalNagarik All rights reserved. | Website by Appharu.com