विराटनगर । सुनसरीको इटहरी उपमहानगरपालिकाको जुट विकासस्थित बसोबास रहेको क्षेत्रमा आज बिहान चितुवा पसेको छ ।
इलाका प्रहरी कार्यालय इटहरीका प्रहरी नायब उपरीक्षक खगेन्द्रबहादुर खड्काका अनुसार इटहरी- ६ को जुट विकास क्षेत्रमा बिहानै चितुवा देखिएको थियो । बस्तीमा चितुवा आएपछि स्थानीय त्रसित बनेका छन् । चितुवा देखिएसँगै पक्रन नेपाल प्रहरी र सशस्त्र प्रहरीको टोली परिचालन भएको छ।
इटहरीका प्रमुख मेयर हेमकर्ण पौडेलले चितुवा नियन्त्रण गर्न प्रयास भइरहेको बताएका छन्। मेयर पौडेलले वन कार्यालय, कोसी टप्पु वन्यजन्तु आरक्षसमेतका निकायलाई बस्तीमा चितुवा भेटिएको जानकारी गराएको जनाए । प्रहरीले स्थानीयलाई घरभित्र ढोका लगाएर बस्न आग्रह गरेको छ ।
जुट विकास क्षेत्र उत्तरतर्फ रहेको चारकोसे जंगलबाट चितुवा बस्तीमा पसेको हुन सक्ने बताइएको छ ।
प्रकाशित मिति: ३० जेष्ठ २०७९, सोमबार
प्रतिक्रिया