सर्वोच्चका अधिकृत विष्टलाई थुनामा राख्न रेशम चौधरीले दिएको रिटमा आज सुनुवाइ हुँदै

काठमाडौं। सर्वोच्च अदालतका निलम्बित शाखा अधिकृत महिमानसिंह विष्टलाई थुनामा राख्न नागरिक उन्मुक्ति पार्टी नाउपाका संरक्षक रेशम चौधरीले दिएको निवेदनमाथि आज सुनुवाइ हुँदै छ । सोमबार चौधरीले उच्च अदालत पाटनमा निवेदन दिएका थिए ।

उक्त निवेदनमाथि सुनुवाइका लागि मंगलबार पेसी तोकिएको चौधरीका अधिवक्ता टीकाबहादुर कुँवरले बताए । विष्टले गत वैशाख १७ गते चौधरीलाई तत्काल पक्राउ गरी कैदमा राख्न प्रहरी र डिल्लीबजार कारागारमा अनधिकृत पत्र लेखेपछि सोही दिन चौधरी पक्राउ परेका थिए ।

उक्त अनधिकृत पत्रका कारण ५ घण्टा चौधरी कारागारमा बस्नुपरेको थियो । सर्वोच्चले विष्टको पत्र अनधिकृत भन्दै पत्र सच्चाएर पठाएपछि उनलाई छाडिएको थियो ।

अनधिकृत पत्र लेख्ने विष्टविरुद्धको लिखत किर्तेको मुद्दा जिल्ला अदालत काठमाडौँमा विचाराधीन छ । गत जेठ ५ गते जिल्लाले विष्टलाई एक लाख धरौटीमा मुद्दाको पुर्पक्षका लागि तारेखमा छाडेको थियो ।

विष्टलाई धरौटीमा छाड्ने आदेश बेरितको भई त्रुटिपूर्ण भएकाले उक्त आदेश बदर गरी विष्टलाई थुनामै राख्न मागसहित चौधरी उच्च पुगेका हुन् ।

प्रकाशित मिति: २० जेष्ठ २०८२, मंगलबार