काठमाडौं । नेपाली कांग्रेसमा उठेको विशेष महाधिवेशनको मागले चर्किएको विवादबीच राष्ट्रपति रामचन्द्र पौडेलले सो आन्दोलनमा सक्रिय नेताहरूलाई शीतलनिवासमा छलफलका लागि बोलाएका छन्।
विशेष महाधिवेशनको मागसहित हस्ताक्षर अभियान सञ्चालन गरिरहेका नेताहरूलाई समसामयिक राजनीतिक परिस्थितिबारे कुराकानी गर्न राष्ट्रपति पौडेलले आमन्त्रण गरेको शीतलनिवास स्रोतले जनाएको छ।
स्रोतका अनुसार, लुम्बिनी प्रदेश सभापतिसहित हस्ताक्षर अभियानमा संलग्न एक दर्जनभन्दा बढी नेताहरू आज शीतलनिवासमा उपस्थित हुनेछन्। हस्ताक्षर अभियानको नेतृत्व गरिरहेका नेता गुरुराज घिमिरेसँग भने राष्ट्रपति पौडेलले अलग्गै भेट गरेर प्रारम्भिक धारणा सुनेको बताइएको छ।
कांग्रेसभित्र आगामी निर्वाचनअघि वा पछि महाधिवेशन गर्ने भन्ने विषयमा तीव्र मतवैभिन्न्य देखिएको छ। यही बहसलाई टुंग्याउन र आगामी कदम तय गर्न पार्टीले मंसिर ११ गते केन्द्रीय समिति बैठक बोलाइसकेको छ।
प्रकाशित मिति: ८ मंसिर २०८२, सोमबार
प्रतिक्रिया