काठमाडौं । काठमाडौंका महाराजगञ्ज र नैकाप क्षेत्रमा सवारीसाधनमा आगजनी गरेको आरोपमा प्रहरीले दुई जनालाई पक्राउ गरेको छ।
पक्राउ पर्नेमा सुमन बोहरा र कृष्ण मिजार रहेका छन्। बोहरा वीरेन्द्रनगर नगरपालिका सुर्खेत घर भई हाल चन्द्रागिरी नगरपालिका–६ बस्दै आएका छन् भने मिजार पनि चन्द्रागिरी–६ कै स्थायी बासिन्दा हुन्।
उनीहरूलाई थानकोट क्षेत्रबाट नियन्त्रणमा लिइएको उपत्यका अपराध अनुसन्धान कार्यालय का एसएसपी सन्तोष खड्का ले जानकारी दिएका छन्।
मंगलबार बिहान नैकापस्थित सिप्रदी ट्रेडिङ्गको कार्यालय नजिक पार्किङमा राखिएको बिएए २८३६ नम्बरको टोयोटा कार र महाराजगञ्जमा बा ७ च १४०१ नम्बरको मारुती भ्यान आगजनी गरिएको अवस्थामा फेला परेको थियो।
प्रहरीको प्रारम्भिक अनुसन्धानअनुसार उक्त आगजनी घटनामा उनीहरूको संलग्नता देखिएको छ। एसएसपी खड्काका अनुसार उनीहरू दुर्गा प्रसाईं नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’सँग आबद्ध रहेको खुलेको छ।
आगलागी गरिएको स्थानबाट उक्त अभियानसँग सम्बन्धित पर्चासमेत बरामद भएको प्रहरीले जनाएको छ।
प्रकाशित मिति: १९ फाल्गुन २०८२, मंगलबार
प्रतिक्रिया