काठमाडौ । अमेरिका, इजरायल र इरानबीच जारी भीषण युद्धको प्रभाव छिमेकी खाडी मुलुक कुवेतसम्म फैलिँदा एक बालिकाको मृत्यु भएको छ।
कुवेत स्वास्थ्य मन्त्रालयका अनुसार राजधानीको एक आवासीय क्षेत्रमा खसेको क्षेप्यास्त्रको छर्राले ती बालिका गम्भीर घाइते भएकी थिइन्। मन्त्रालयका प्रवक्ता डा. अब्दुल्लाह अल-सुन्दले जारी गरेको विज्ञप्तिमा चिकित्सकहरूले घाइते बालिकालाई बचाउने प्रयास गरे पनि सफल नहुने जानकारी दिएका छन्।
मध्यपूर्वमा तीव्र बनेको त्रिपक्षीय सैन्य टकरावका कारण कुवेतको सुरक्षा व्यवस्थामा चुनौती थपिएको छ। इरान र अमेरिकी गठबन्धनबीचको हवाई युद्धका क्रममा खसेका भग्नावशेष र छर्राले सर्वसाधारणको ज्यान लिन थालेको छ। यो द्वन्द्व सुरु भएयता कुवेतमा मात्रै कम्तीमा तीन जनाको मृत्यु भइसकेको तथ्यांक सार्वजनिक गरिएको छ।
आवासीय क्षेत्रमा घातक छर्राहरू खस्दा कुवेतका स्थानीय बासिन्दा र आप्रवासीबीच त्रास फैलिएको छ। विशेषगरी राजधानी क्षेत्रका घरमा क्षति पुग्ने र नागरिक हताहत हुने क्रम बढ्दै गएपछि सरकारले सतर्क रहन नागरिकहरूलाई अपिल गरेको छ।
प्रकाशित मिति: २० फाल्गुन २०८२, बुधबार
प्रतिक्रिया