काठमाडौं । जिल्ला प्रहरी कार्यालय सप्तरीका प्रमुख प्रहरी उपरीक्षक (एसपी) गौतम केसीमाथि छानबिन गर्न विशेष समिति गठन गरिएको छ।
मधेश प्रदेश प्रहरी कार्यालयले एसपी केसीसँग सम्बन्धित विषयमा अनुसन्धान गर्न वरिष्ठ प्रहरी उपरीक्षक (एसएसपी)को नेतृत्वमा समिति गठन गरेको हो। नेपाल प्रहरीका केन्द्रीय प्रवक्ता तथा प्रहरी नायव महानिरीक्षक (डीआईजी) अभि नारायण काफ्लेका अनुसार एसएसपी कमल थापाको नेतृत्वमा समिति बनाइएको छ।
समितिले गठनसँगै काम सुरु गरिसकेको छ र एसपी केसीसँग प्रारम्भिक सोधपुछ पनि अघि बढाइसकेको जनाइएको छ।
एसपी केसी र एक सर्वसाधारणबीचको फोन संवादको अडियो सार्वजनिक भएपछि यो विषय विवादमा आएको हो। उक्त संवादमा उजुरी दर्ता गर्न खोज्दा प्रहरीले असहयोग गरेको तथा आवश्यक सहजीकरण नगरेको गुनासो गरिएको सुनिन्छ।
सोही घटनाको सत्यतथ्य पत्ता लगाउन र आवश्यक कारबाही प्रक्रिया अघि बढाउन समिति गठन गरिएको प्रहरीले जनाएको छ।
प्रकाशित मिति: ८ बैशाख २०८३, मंगलबार
प्रतिक्रिया