काठमाडौं । पूर्वमन्त्री महेश बस्नेतकी पत्नी अम्बिका बस्नेतसहित १० जनाविरुद्धको घटनाबारे प्रहरीले अनुसन्धान प्रक्रिया सम्पन्न गरेको छ।
माइतीघर मण्डलामा शोभा पाठकसँग भएको विवादपछि वैशाख १४ गते अम्बिका बस्नेतसहितको समूहलाई प्रहरीले नियन्त्रणमा लिएको थियो। सो घटनामा संलग्न सबै १० जनामाथिको अनुसन्धान टुंग्याएर प्रतिवेदन सरकारी वकिल कार्यालयमा बुझाइएको जिल्ला प्रहरी परिसर काठमाडौंका एसपी पवन भट्टराईले जानकारी दिएका छन्।
उनका अनुसार सोमबार नै अनुसन्धान प्रतिवेदन सरकारी वकिलसमक्ष पेस गरिएको हो। प्रहरीको रायमा उनीहरूमाथि ‘ज्यान मार्ने उद्योग’ सम्बन्धी कसुरमा मुद्दा चलाउनुपर्ने उल्लेख गरिएको छ।
उक्त घटनामा संलग्न सबै अभियुक्त महिला रहेका छन्। वैशाख १४ गते शोभा पाठक र रश्मिला धामीसहितका महिलाहरू माइतीघरमा सुधन गुरुङको पुनर्बहालीको माग गर्दै धर्नामा बसेका बेला अम्बिका बस्नेत आफ्नो समूहसहित त्यहाँ पुगेकी थिइन्। त्यसक्रममा दुई पक्षबीच झडप भई हात हालाहालको अवस्था सिर्जना भएको थियो।
प्रकाशित मिति: २२ बैशाख २०८३, मंगलबार
प्रतिक्रिया