होक्काइडोमा ६.२ म्याग्निच्युडको भूकम्प

एजेन्सी । जापानको उत्तरी टापु होक्काइडोमा सोमबार बिहान ६.२ म्याग्निच्युडको भूकम्प गएपछि थप शक्तिशाली झट्काको सम्भावनालाई ध्यानमा राख्दै सतर्कता बढाइएको छ । पछिल्ला दिनहरूमा निरन्तर देखिएको भूकम्पीय गतिविधिका बीच आएको यो कम्पनले जोखिम अझै कायम रहेको संकेत गरेको छ ।

जापानी मौसम विज्ञान एजेन्सी (जेएमए) का अनुसार स्थानीय समयअनुसार बिहान ५ः२३ बजे आएको भूकम्प होक्काइडोको दक्षिणी क्षेत्रमा केन्द्रित थियो । भूकम्पको गहिराइ करिब ८३ किलोमिटर रहेको र प्रारम्भिक ६.१ म्याग्निच्युडको अनुमानलाई संशोधन गर्दै ६.२ कायम गरिएको जनाइएको छ ।

यस भूकम्पपछि सुनामीको चेतावनी जारी नगरिए पनि प्रभावित क्षेत्रमा बलियो कम्पन महसुस गरिएको थियो । अमेरिकी भूगर्भीय सर्वेक्षणका अनुसार भूकम्पको केन्द्र जनघनत्व कम भएको क्षेत्रमा परेकाले ठूलो क्षतिको सम्भावना न्यून देखिएको छ । तर जेएमएका अधिकारीहरूले शक्तिशाली कम्पन भएका स्थानमा चट्टान खस्ने तथा भूस्खलनको जोखिम बढ्न सक्ने चेतावनी दिएका छन् ।

जेएमएले आगामी केही दिन र हप्तामा समान स्तरका थप भूकम्प आउने सम्भावना उच्च रहेको उल्लेख गर्दै स्थानीय बासिन्दालाई सतर्क रहन आग्रह गरेको छ । यसअघि केही घण्टा अघि नै होक्काइडोभन्दा दक्षिण समुद्री क्षेत्रमा ५.० म्याग्निच्युडको अर्को भूकम्प गएको थियो, जसले क्षेत्रको भूकम्पीय सक्रियता बढिरहेको संकेत गरेको छ ।

यो घटनाक्रम गत साता उत्तरी इवाटे प्रान्तमा आएको ७.७ म्याग्निच्युडको शक्तिशाली भूकम्पपछि भएको हो । उक्त भूकम्पले ठूलो क्षति नगरे पनि देशभर त्रास फैलाएको थियो । यसको प्रभाव राजधानी टोकियोसम्म पुगेको थियो, जहाँ ठूला भवनहरू हल्लिएका थिए र केही व्यक्ति घाइते भएका थिए । साथै, इवाटे क्षेत्रमा करिब ८० सेन्टिमिटर उचाइका सुनामी छालहरू देखिएका थिए भने अन्य उत्तरी तटीय क्षेत्रमा साना छालहरू पुगेका थिए ।

यसअघि जेएमएले ८.० वा सोभन्दा माथिको शक्तिशाली भूकम्प आउने सम्भावना सामान्य अवस्थाभन्दा बढी रहेको चेतावनी दिएको थियो । अहिलेको ६.२ म्याग्निच्युडको भूकम्पलाई पनि सोही शृङ्खलाको एक भागका रूपमा हेरिएको छ ।

जापान प्रशान्त महासागरको ‘रिङ अफ फायर’ क्षेत्रमा पर्ने भएकाले विश्वकै सबैभन्दा भूकम्पीय रूपमा सक्रिय देशमध्ये एक हो । चार प्रमुख टेक्टोनिक प्लेटहरूको सङ्गममा रहेको यस देशमा हरेक वर्ष करिब १,५०० भूकम्प आउने गरेका छन्, जुन विश्वका कुल भूकम्पमध्ये झन्डै १८ प्रतिशत हो ।

सन् २०११ मा जापानमा आएको ९.० म्याग्निच्युडको विनाशकारी भूकम्प र त्यसपछिको सुनामीले १८ हजार ५०० भन्दा बढी मानिसको ज्यान गएको वा बेपत्ता भएका थिए । त्यसयता जापानले भूकम्प पूर्वतयारी र जोखिम न्यूनीकरणमा ठूलो लगानी गर्दै आएको भए पनि पछिल्ला गतिविधिहरूले पुनः उच्च सतर्कता आवश्यक रहेको देखाएका छन् ।