वासिङ्टन डीसी। अमेरिका र इरानबीच भइरहेको सम्भावित आणविक सम्झौता बारे अन्तिम निर्णय आउन अझै केही दिन लाग्ने अमेरिकी राष्ट्रपति कार्यालय (ह्वाइट हाउस) ले जनाएको छ ।
अन्तर्राष्ट्रिय सञ्चारमाध्यमहरूका अनुसार, प्रस्तावित सम्झौताको खाकालाई इरानको उच्च नेतृत्वबाट औपचारिक स्वीकृति प्राप्त हुन केही समय लाग्ने भएकाले अन्तिम घोषणामा ढिलाइ भएको हो ।
एक वरिष्ठ अमेरिकी अधिकारीलाई उद्धृत गर्दै रिपोर्टमा जनाइएको छ कि दुवै पक्षबीच सकारात्मक र रचनात्मक प्रगति भइरहेको छ ।
केही दिनभित्रै सम्झौता सम्पन्न हुन सक्ने बलियो अपेक्षा गरिए पनि प्राविधिक र कानुनी प्रक्रियाहरू अझै अन्तिम चरणमा रहेकाले सबै प्रक्रिया पूरा भएपछि मात्र औपचारिक घोषणा गरिने छ ।
लामो समयदेखिको कूटनीतिक गतिरोध अन्त्य गर्ने ठानिएको यस सम्भावित सम्झौताले मध्यपूर्वको क्षेत्रीय शान्ति, स्थायित्व तथा इरानको आणविक कार्यक्रममाथिको अन्तर्राष्ट्रिय चासोलाई सम्बोधन गर्ने अपेक्षा गरिएको छ ।
यसैबीच, अमेरिकी राष्ट्रपति डोनाल्ड ट्रम्पले वार्तामा संलग्न आफ्ना प्रतिनिधिहरूलाई रणनीतिक धैर्यता र सावधानी अपनाउन निर्देशन दिएका छन् ।
उनले राष्ट्रिय सुरक्षा र दूरगामी हितका विषयमा हतार गर्न नहुने बताएका छन् ।
तर, वार्ता सकारात्मक दिशामा अघि बढे पनि अमेरिकाले इरानमाथिको दबाब भने कायमै राखेको छ ।
सम्झौता औपचारिक रूपमा स्वीकृत र हस्ताक्षर नभएसम्म इरानी बन्दरगाहहरूमाथि लागू गरिएको आर्थिक तथा व्यापारिक नाकाबन्दी यथावत् रहने ह्वाइट हाउसले स्पष्ट पारेको छ ।
प्रकाशित मिति: ११ जेष्ठ २०८३, सोमबार
प्रतिक्रिया