काठमाडौं। नेपाल प्रहरी को केन्द्रीय अनुसन्धान ब्युरो (सीआईबी) ले लैनचौरस्थित दुग्ध विकास संस्थान (डीडीसी) को केन्द्रीय कार्यालयमा बुधबार आकस्मिक छापा मारेको छ ।
डीडीसीभित्र ठूलो आर्थिक अनियमितता र वित्तीय कैफियत भएको विशेष सूचनापछि सीआईबीको टोली अनुसन्धानका लागि कार्यालय पुगेको हो ।
सीआईबी प्रमुख प्रहरी अतिरिक्त महानिरीक्षक (एआईजी) मनोज केसीले डीडीसीसँग सम्बन्धित गम्भीर र संवेदनशील सूचना प्राप्त भएपछि अनुसन्धान प्रक्रिया अघि बढाइएको पुष्टि गरेका छन् । उनले अनुसन्धान प्रारम्भिक चरणमै रहेकाले विस्तृत विवरण सार्वजनिक गर्न नमिल्ने बताए ।
प्रहरी स्रोतका अनुसार सीआईबीले डीडीसीको आर्थिक कारोबार, खरिद प्रक्रिया तथा प्रशासनिक निर्णयसँग सम्बन्धित महत्त्वपूर्ण कागजात नियन्त्रणमा लिएको छ ।
संस्थानभित्र लामो समयदेखि आन्तरिक विवाद, गुटबन्दी र वित्तीय पारदर्शितामाथि प्रश्न उठ्दै आएका बेला सीआईबीले गम्भीर अध्ययन थालेको बुझिएको छ । नियन्त्रणमा लिइएका कागजातको अध्ययनपछि मात्रै अनियमितताको वास्तविक अवस्था र संलग्न व्यक्तिको पहिचान हुने प्रहरीले जनाएको छ ।
प्रकाशित मिति: १३ जेष्ठ २०८३, बुधबार
प्रतिक्रिया