देश जुनसुकै बेला दुर्घटनामा जान सक्ने जोखिम बढ्यो : राजेन्द्र लिङ्देन

काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले मुलुक जुनसुकै बेला दुर्घटनामा जान सक्ने जोखिम बढेको बताएका छन् ।

कञ्चनपुरमा आयोजित राप्रपाको जिल्ला अधिवेशन उद्घाटन गर्दै लिङ्देनले नयाँ सरकार गठन हुँदैमा मुलुक सही दिशामा अघि बढेको निष्कर्ष निकाल्न नसकिने बताए । उनले नेपाल भूराजनीतिक रूपमा समेत गम्भीर जोखिमतर्फ उन्मुख भएको दाबी गरे ।

‘नयाँ सरकार आयो, देश अब एउटा बाटोमा गयो भन्ने कुरा होइन । देश अहिले झन् ठूलो अँध्यारो सुरुङमा प्रवेश गरेको छ,’ उनले भने, ‘कुनै पनि बेला देश दुर्घटनामा जान सक्ने सम्भावना बढेर गएको छ ।’

मुलुकलाई निकास दिन सक्ने पार्टी राप्रपा मात्रै रहेको दाबी गर्दै उनले पार्टीलाई अधिवेशनमार्फत थप सुधार र सुदृढ बनाउनुपर्नेमा जोड दिए ।

‘राप्रपाको राष्ट्रिय राजनीतिमा सम्भावना अझ बढेको छ, अझ बलियो भएर गएको छ । अब कांग्रेस, कम्युनिस्टहरू फेरि उठ्न सक्ने अवस्थामा छैनन्,’ उनले भने, ‘नयाँ भन्नेहरू कुहिरोमा हराएको कागजस्ता भएका छन् । यत्रो प्रचण्ड बहुमत प्राप्त गर्दाखेरि पनि सामान्य दैनिक प्रशासनसमेत सञ्चालन गर्न सक्ने अवस्थामा छैनन् ।’

सरकारका गलत कामको विरोध गर्दा सामाजिक सञ्जालमार्फत आक्रमण हुने डरका कारण नागरिक मौन बसेको लिङ्देनले बताए । विगतमा माओवादीविरुद्ध बोल्दा बन्दुकको सामना गर्नुपरेको उल्लेख गर्दै उनले अहिले सरकारको विरोध गर्दा सामाजिक सञ्जालबाट आक्रमण हुने अवस्था रहेको टिप्पणी गरे ।

‘आज मान्छेले नबोलेको मात्रै हो । हिजो माओवादीविरुद्ध बोल्दा बन्दुक आउँथ्यो, अहिले यो सरकारको गलत क्रियाकलापको विरुद्ध बोल्यो भने फेसबुक आउँछ,’ उनले भने, ‘त्यसैले मान्छे नबोलेको मात्रै हो । तर, देश ठीक ठाउँमा छैन । यो कसै न कसैले बोल्नुपर्छ ।’

लिङ्देनले भूराजनीतिक दृष्टिले नेपाल अत्यन्त जोखिमपूर्ण अवस्थामा पुगेको र विश्व समुदायबाट नेपाल एक्लिँदै गएको दाबी गरे । उनले विगतमा एकल बहुमत प्राप्त दलले समेत पाँच वर्ष संसद् चलाउन नसकेको दृष्टान्त प्रस्तुत गर्दै वर्तमान संसद्को भविष्यप्रति पनि आशंका व्यक्त गरे ।

‘२००७ सालपछि २०१५ मा नेपाली कांग्रेसले दुई तिहाइ ल्यायो, त्यो पाँच वर्ष चलेन । २०४८ सालमा कांग्रेसले बहुमत ल्यायो, त्यो पनि पाँच वर्ष चलेन,’ उनले भने, ‘२०५४ मा पनि त्यसै प्रकारका बहुमतहरू आए, तर कुनै पनि संसद् पाँच वर्ष चलेको छैन ।’

वर्तमान संसद् पनि पाँच वर्ष नै चल्छ भन्ने ग्यारेन्टी नरहेको भन्दै उनले पार्टीका नेता–कार्यकर्तालाई समयमै सच्चिएर र सुध्रिएर संगठनलाई तयार बनाउन आग्रह गरे ।

‘अहिले भन्नु हतारजस्तो हुन्छ, तर हाम्रो कार्यकर्ता पङ्क्तिलाई भनेर जान्छु—यो संसद् पनि पाँच वर्ष जान्छ भन्ने कुनै ग्यारेन्टी छैन,’ उनले भने, ‘त्यसैले हामी सच्चिएर, सुध्रिएर तयार बनौँ ।’

प्रकाशित मिति: ३० भाद्र २०८३, मंगलबार