दाइको हत्या गरेर अन्त्येष्टिमै सहभागी भए भाइ

काठमाडौं । पाकिस्तानको पञ्जाब प्रान्तमा पैतृक सम्पत्तिको विवादमा आफ्नै दाइको हत्या गरेका भाइ उनकै अन्त्येष्टिमा सहभागी भएको खुलेको छ । प्रहरीले अनुसन्धानका क्रममा मोहम्मद बिलालले दाइ मोहम्मद सुफियानको हत्या गरेको पत्ता लगाएको हो ।

प्रहरीका अनुसार अक्टोबर १७ मा बिलालले ह्वाट्सएपमार्फत दाइलाई गुजरात सहर बोलाएका थिए । दुवै जना सँगै खाना खाएर मोटरसाइकलमा घर फर्किने क्रममा सुनसान सडकमा पुगेपछि बिलालले दाइको घाँटीमा छुरा प्रहार गरेको अनुसन्धानबाट खुलेको छ ।

हत्या गरेपछि घटनालाई लुटपाटको रूप दिन उनले दाइको मोबाइल र मोटरसाइकलसमेत लगेका थिए । त्यसपछि परिवारलाई आफू साउदी अरेबियामा रहेको भान पार्दै अन्त्येष्टिमा सहभागी भएका थिए ।

प्रहरीका अनुसार सोधपुछका क्रममा बिलालले पैतृक सम्पत्तिको बाँडफाँटमा आफूलाई भेदभाव गरिएको भन्दै दाइको हत्या गरेको स्वीकार गरेका छन् ।

अभियुक्तलाई अदालतमा पेस गरिएपछि तीन दिन प्रहरी हिरासतमा राख्न अनुमति दिइएको छ । घटनाबारे थप अनुसन्धान भइरहेको प्रहरीले जनाएको छ ।

प्रकाशित मिति: १० कार्तिक २०८३, सोमबार