काठमाडौं । पाकिस्तानको ब्रोड पिक हिमालमा हिमपहिरोमा परी ज्यान गुमाएका विश्वप्रसिद्ध नेपाली पर्वतारोही तथा कीर्तिमानी आरोही निर्मल पुर्जा ‘निम्स दाइ’सहित चार जना आरोहीको शव सफलतापूर्वक उद्धार गरी बेस क्याम्पमा ल्याइएको छ।
निम्स दाइका व्यावसायिक साझेदार तथा प्रतिनिधिसभा सदस्य मिङ्मा डेभिड शेर्पाले पाकिस्तानबाट शव उद्धार सम्पन्न भएको जानकारी दिएका हुन्। उनका अनुसार निर्मल पुर्जासँगै चिनियाँ आरोही जोङ वाङ, निमा शेर्पा र किलु शेर्पाको शव पनि जोखिमपूर्ण उद्धार अभियानमार्फत बेस क्याम्पमा ल्याइएको हो।
उद्धार कार्य अत्यन्तै जटिल भौगोलिक अवस्था, उच्च हिमाली जोखिम र प्रतिकूल मौसमका बीच सञ्चालन गरिएको थियो। चुनौतीपूर्ण परिस्थितिका बाबजुद उद्धार टोलीले सफलतापूर्वक चारै जनाको शव सुरक्षित रूपमा बेस क्याम्पसम्म ल्याउन सफल भएको जनाएको छ।
उक्त उद्धार अभियानको नेतृत्व वरिष्ठ पर्वतारोही मिङ्मा जीले गरेका थिए। अभियानमा पाकिस्तानी पर्वतारोही सिरबाज खान तथा फिल्डमा खटिएको विशेष उद्धार टोलीले समेत सक्रिय भूमिका निर्वाह गरेको बताइएको छ।
हिमाली क्षेत्रको कठिन भूगोल र मौसमका कारण उद्धार कार्य निकै जोखिमपूर्ण बने पनि समन्वित प्रयासपछि अभियान सफलतापूर्वक सम्पन्न भएको सम्बद्ध स्रोतहरूले जनाएका छन्।
प्रकाशित मिति: २० श्रावण २०८३, बुधबार
प्रतिक्रिया