काठमाडौं । अर्जेन्टिनाका महान् फुटबलर लियोनल मेसीले राष्ट्रिय टोलीबाट संन्यास घोषणा गरेपछि उनको सम्मानमा यस सप्ताहन्त हुने देशभरका सबै फुटबल खेल १०औँ मिनेटमा एक मिनेटका लागि रोकिने भएका छन्।
अर्जेन्टिना फुटबल संघ (एएफए) का अनुसार पुरुष र महिला दुवै डिभिजनका खेलमा पहिलो हाफको १०औँ मिनेटमा ६० सेकेन्डसम्म ताली बजाएर मेसीको योगदानको सम्मान गरिनेछ। १०औँ मिनेट मेसीले राष्ट्रिय टोलीमा लगाएको चर्चित १० नम्बरको जर्सीप्रति समर्पित गरिएको हो।
खेलअघि रंगशालाका ठूला स्क्रिनमा एएफएको विशेष भिडियोसमेत प्रदर्शन गरिनेछ।
३९ वर्षीय मेसीले गत सोमबार राष्ट्रिय टोलीबाट संन्यासको घोषणा गरेका थिए। सन् २००५ मा सिनियर टोलीमा डेब्यु गरेका उनी अर्जेन्टिनाका लागि सर्वाधिक खेल खेल्ने र सर्वाधिक गोल गर्ने खेलाडी हुन्।
मेसीको कप्तानीमा अर्जेन्टिनाले सन् २०२१ कोपा अमेरिका, २०२२ कतार विश्वकप र २०२४ कोपा अमेरिका जितेको थियो। उनले सन् २००६ देखि २०२६ सम्मका छ विश्वकप खेलेका छन्।
विश्वकपका ३४ खेलमा २१ गोल गरेका आठपटकका बालोन डी’ओर विजेता मेसी राष्ट्रिय टोलीबाट बाहिरिए पनि अमेरिकी मेजर लिग सकर क्लब इन्टर मियामीबाट क्लब फुटबल भने जारी राख्नेछन्।
संन्यास घोषणा गर्दै मेसीले अर्जेन्टिनाको जर्सीका लागि आफूले सधैँ सर्वस्व दिएको र अहिले टोलीबाट बिदा हुने उपयुक्त समय आएको बताएका थिए।
प्रकाशित मिति: २१ भाद्र २०८३, आइतबार
प्रतिक्रिया