काठमाडौं। राष्ट्रिय अनुसन्धान विभागका प्रमुख अनुसन्धान अधिकृत ठाकुरप्रसाद केसीविरुद्ध नक्कली शैक्षिक प्रमाणपत्र प्रयोग गरी सरकारी सेवामा प्रवेश गरेको र सोही प्रमाणपत्रका आधारमा विभिन्न पदमा बढुवा भएको आरोपमा विशेष अदालतमा मुद्दा दायर भएको छ।
अख्तियार दुरुपयोग अनुसन्धान आयोगका अनुसार केसीले भारतको उत्तर प्रदेश माध्यमिक शिक्षा परिषद्बाट जारी भएको हाईस्कुलको नक्कली प्रमाणपत्र पेस गरी सहायक निरीक्षक पदमा नियुक्ति लिएका थिए। त्यसपछि सोही प्रमाणपत्रका आधारमा २०६६ सालमा वरिष्ठ अनुसन्धान सहायक, २०७३ सालमा अनुसन्धान अधिकृत र २०८१ सालमा प्रमुख अनुसन्धान अधिकृत पदमा बढुवा भएको आयोगको दाबी छ।
नक्कली प्रमाणपत्रमार्फत नियुक्ति र बढुवा भई सरकारी पद, सुविधा तथा लाभ लिएको भन्दै आयोगले केसीविरुद्ध कैद र जरिवानाको मागदाबी गर्दै बुधबार विशेष अदालत, काठमाडौंमा आरोपपत्र दायर गरेको जनाएको छ।
प्रकाशित मिति: २४ भाद्र २०८३, बुधबार
प्रतिक्रिया