काठमाडौं । नेकपाका महासचिव नेत्रविक्रम चन्द ‘विप्लव’का पुत्र डा. प्रकाश विवाह बन्धनमा बाँधिएका छन् ।
नेकपा निकट जनस्वास्थ्य संगठनमा आबद्ध डा. प्रकाशले मान्यता सीसँग बुधबार लगन गाँठो कसेका हुन् । उनीहरू केही समयदेखि प्रेम सम्बन्धमा रहेको बताइएको छ ।
मान्यता पनि पेशाले प्रकाशजस्तै चिकित्सक हुन् । विवाह कार्यक्रमको व्यानरमा उनको नामपछाडि सी थर लेखिएको थियो । नेकपाको केन्द्रीय समिति बैठकले केही समयअघि पार्टीका नेता तथा कार्यकर्ताले आफ्नो थर हटाएर सी लेख्ने निर्णय गरेको थियो ।
‘प्रगतिशील विवाह कार्यक्रम’को व्यानरमुनि बिना तामझाम कपिलवस्तुमा बुधबार विवाह भएको थियो ।
पार्टी केन्द्रीय समितिले आयोजना गरेको विवाह कार्यक्रममा प्रकाश सदाझैं सर्ट र पाइन्टमा उपस्थित थिए भने डा. मान्यता सारी र ब्लाउजमा सामान्य ढंगले सजिएकी थिइन् ।
पार्टीका नेता तथा कार्यकर्तालाई साक्षी राखेर निकै संक्षिप्त रूपमा गरिएको विवाह कार्यक्रममा ३० हजार रूपैयाँ मात्र खर्च भएको बताइएको छ ।
प्रकाशित मिति: ११ आश्विन २०८०, बिहिबार
प्रतिक्रिया