कारागारमा बम्जनले सोधे – यहाँ जीमखाना छैन ?

काठमाडौं । बालयौन शोषण र व्यक्ति बेपत्ता बनाएको अभियोगमा पुर्पक्षको लागि थुनामा रहेका कथित तपस्वी रामबहादुर बम्जनले कारागारमा जीमको सुविधा मागेका छन् ।

बिहीबार जिल्ला अदालत सर्लाहीले पुर्पक्षका लागि उनलाई थुनामा पठाएको थियो । उनलाई अहिले महोत्तरीको जलेश्वर कारागारमा राखिएको छ । बम्जनले आफूले घरमा जिम गर्ने गरेको भन्दै जेलमा भए नभएको सोधेका हुन् ।

कारागार प्रशासनका एक कर्मचारीले भने, “आफूले घरमा जीम गर्ने भनेको भन्दै उनले यहाँ जीम छैन भनेर सोधे । बिहान हिँडडुल गर्ने मात्र ठाउँ छ । अरु केही छैन भनेर यहाँको सुविधाबारे जानकारी गरायौँ ।”

बम्जन पक्राउ परेका घरभित्र जिमखाना नै खडा गरेको भेटिएको थियो । घरमा टप बाथसहितको नुहाउने ठाउँ र आरामदायी बेडरुम भेटिएको थियो ।

कारागारमा बम्जनसँगै अरू ५-७ जना जोगी कैदी पनि छन् । बम्जनले आफूलाई सादा खाना माग गरेकाले अरू जोगीलाई बनाएको खाना दिने कारागारले जनाएको छ । बम्जनलाई बिहीबार साँझ सवा सात बजे जलेश्वर कारागार लगिएको थियो।

प्रकाशित मिति: २९ पुस २०८०, आइतबार