काठमाडौं । नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले माओवादी केन्द्रप्रति जनताको आशा र विश्वास पुनः जागृत भएको बताएका छन्।
मध्यपहाडी लोकमार्ग जनजागरण अभियानअन्तर्गत बागलुङको बुर्तिबाङमा आयोजित आमसभालाई सम्बोधन गर्दै अध्यक्ष दाहालले पार्टी नयाँ ऊर्जा र गतिका साथ अघि बढिरहेको जानकारी दिए।
अभियानका क्रममा जनताको गुनासा, सुझाव र अपेक्षा ग्रहण गर्दै पार्टी अघि बढिरहेको उल्लेख गर्दै उनले यो अभियानले देशमा नयाँ राजनीतिक लहर ल्याउने विश्वास व्यक्त गरे। पूर्वप्रधानमन्त्रीसमेत रहेका दाहालले राष्ट्रिय एकता सुदृढ गर्दै किसान, मजदुर र उत्पीडित वर्गका समस्यामाथि गहिरो ध्यान केन्द्रित गर्ने वातावरण बनाइने बताए।
प्रचण्डले आफ्नो प्रधानमन्त्री कार्यकालमा देशमा महत्वपूर्ण परिवर्तनहरू भएको दाबी गर्दै राष्ट्रिय गौरवका परियोजना—जसमा मध्यपहाडी लोकमार्ग पनि पर्छ—त्यतिबेलै सुरु गरिएको स्मरण गराए। उनले यो लोकमार्गले लाखौं मध्यपहाडी नागरिकको जीवनमा सकारात्मक प्रभाव पारेको धारणा राखे।
“नेपालमा स्वच्छ, निष्ठावान् र जनउत्तरदायी राजनीति अझै मजबुत रूपमा स्थापित भइनसकेको” उल्लेख गर्दै अध्यक्ष दाहालले सबै राजनीतिक दलले अब इमान्दारिताका साथ जनताको पक्षमा केन्द्रित हुन आवश्यक रहेको बताए। उनले माओवादी केन्द्रले थालिएको जनजागरण अभियानले जनताबीच उत्साह र आशा जगाएको अनुभव आफूले पाएको उल्लेख गरे।
देशमा बढ्दो भ्रष्टाचारप्रति चिन्ता व्यक्त गर्दै दाहालले माओवादी केन्द्रले त्यसविरुद्ध सतर्कता र खबरदारी गरिरहेको पनि प्रस्ट पारे। उनले पार्टीलाई जनमुखी, उत्तरदायी र सशक्त बनाउँदै अघि बढ्ने प्रतिबद्धता व्यक्त गरे।
प्रकाशित मिति: ८ जेष्ठ २०८२, बिहिबार
प्रतिक्रिया