काठमाडौं । काठमाडौं महानगरपालिकाले जेन–जी आन्दोलनका क्रममा सिंहदरबारलगायतका स्थानमा आगलागी हुँदा दमकल नपठाएको भन्ने आरोप असत्य भएको जनाएको छ।
महानगर प्रहरी बलका प्रमुख राजु पाण्डेले शुक्रबार पत्रकार सम्मेलनमा सुरक्षाजन्य कारणले दमकललाई घटनास्थलसम्म पुर्याउन नसकिएको स्पष्ट गरे। उनका अनुसार दमकल स्कटिङ गरेर लैजान खोजिए पनि सम्भव नभएकाले ढिलाइ भएको हो।
पाण्डेले भने, “दमकल जान सक्ने अवस्था भएको भए हामीले ढिलाइ गरेका छैनौँ। बालाजु, स्वयम्भूलगायत विभिन्न क्षेत्रबाट पानी ट्यांकरहरूको सहयोग लिइयो। सेनासँग पनि समन्वय गरिएको थियो। महानगरपालिकाले दमकल परिचालन नगरेको भन्ने कुरा गलत हो।”
उनले आन्दोलनपश्चात फोहोर व्यवस्थापनमा महानगर सक्रिय भएको जानकारी पनि दिए। उनका अनुसार भदौ २५ गतेदेखि सुरु गरिएको सरसफाइ अभियानमा ३७४ टिपर फोहोर संकलन गरिएको छ। सरसफाइका क्रममा भेटिएका हतियार सुरक्षाकर्मीलाई बुझाइएको उनले बताए।
पाण्डेले महानगरपालिकाले माथिबाट आएको निर्देशनअनुसार मात्र काम गर्ने भन्दै आन्दोलनमा क्षति न्यूनीकरणका लागि आफूहरू निरन्तर सक्रिय रहेको दाबी गरे।
जेन–जेड आन्दोलनका क्रममा राष्ट्रपति कार्यालय शीतल निवास, उपराष्ट्रपति कार्यालय, सिंहदरबार, सर्वोच्च अदालत, संसद भवनसहित सरकारी र निजी सम्पत्ति जलेर नष्ट भएका थिए।
प्रकाशित मिति: २ आश्विन २०८२, बिहिबार
प्रतिक्रिया