एसिया कप क्रिकेटको सुपर फोर चरणमा पाकिस्तानले श्रीलंकामाथि ५ विकेटको जीत हासिल गरेको छ। गएराति भएको खेलमा पाकिस्तानले टस जितेर फिल्डिङ रोजेको थियो। पहिले ब्याटिङ गरेको श्रीलंकाले २० ओभरमा ८ विकेट गुमाउँदै १३३ रन बनायो। उसका लागि कामिन्दु मेन्डिसले सबैभन्दा राम्रो प्रदर्शन गर्दै ४४ बलमा ५० रन जोडे। पाकिस्तानका बलर शाहिन शाह अफ्रिदीले ३ विकेट लिँदै उत्कृष्ट प्रदर्शन गरे।
१३४ रनको लक्ष्य पछ्याउँदै पाकिस्तानले १८ ओभरमा ५ विकेट गुमाएर लक्ष्य भेट्टायो। पाकिस्तानका साहिबजादा फारहानले २४ रन बनाए भने फखर जमानले १७ रनको योगदान दिए। हुसेन तलतले ३२ रन बनाए। अन्त्यतिर मोहम्मद नवाजले आक्रामक ब्याटिङ गर्दै २४ बलमा नटआउट ३८ रन जोडे र टिमलाई जितसम्म पुर्याए।
यो जितसँगै पाकिस्तानले सुपर फोरमा २ अंक थपेको छ। यसअघि सुपर फोरको पहिलो खेलमा पाकिस्तान भारतसँग ६ विकेटले पराजित भएको थियो। श्रीलंकाविरुद्धको जितले पाकिस्तानको फाइनल प्रवेशको सम्भावना कायमै राखेको छ।
सुपर फोर चरण अन्तर्गत आज भारत र बंगलादेशबीच प्रतिस्पर्धा हुँदैछ। यो खेल सुपर फोरको समीकरणमा महत्त्वपूर्ण हुने अपेक्षा गरिएको छ, जसले फाइनलमा पुग्ने टिमहरूको स्थिति स्पष्ट पार्नेछ।
प्रकाशित मिति: ८ आश्विन २०८२, बुधबार
प्रतिक्रिया