काठमाडौं । राष्ट्रिय स्वतन्त्र पार्टी (रास्वपा) र काठमाडौं महानगरपालिकाका मेयर बालेन शाह तथा ऊर्जामन्त्री कुलमान घिसिङ समूहबीच भएको एकतापछि पार्टीको पदाधिकारी संरचना सम्बन्धी सहमति पनि टुंगिएको छ ।
रास्वपा स्रोतका अनुसार बालेन शाह समूहबाट एक जना महामन्त्री र एक जना सहमहामन्त्री नियुक्त गर्ने सहमति भएको छ । यस्तै, कुलमान घिसिङ समूहलाई एक जना सहमहामन्त्री र एक जना सहप्रवक्ता दिने समझदारी बनेको छ ।
रास्वपा स्रोतले भन्यो, “बालेन र कुलमान समूहबाट दुई–दुई जनालाई पार्टी पदाधिकारीमा समावेश गर्ने भद्र सहमति भएको हो । सहमतिअनुसार नाम भने आउन बाँकी छन्।
पार्टी सभापति रवि लामिछानेले बालेन शाह र कुलमान घिसिङलाई पार्टीमा समेट्ने विषयमा छुट्टाछुट्टै सहमतिपत्रमा हस्ताक्षर गरिसकेको स्रोतले जनाएको छ ।
सहमति अनुसार आगामी प्रतिनिधिसभा निर्वाचनमा बालेन शाहलाई प्रधानमन्त्रीको उम्मेदवार बनाउने समझदारी समेत भएको बताइएको छ । उज्यालो नेपाल पार्टीका संरक्षकसमेत रहेका ऊर्जामन्त्री कुलमान घिसिङलाई रवि लामिछानेपछि पहिलो वरीयताको उपसभापति बनाइएको छ ।
वरीयताका आधारमा कुलमान घिसिङपछि उपसभापतिमा डिपी अर्याल र स्वर्णिम वाग्ले रहने सहमति छ ।
हाल रास्वपामा कबिन्द्र बुर्लाकोटी महामन्त्रीको जिम्मेवारीमा छन् भने सहमहामन्त्रीका रूपमा विपिन आचार्य मात्र छन् । सहप्रवक्तामा प्रतिभा रावल र रमेश प्रसाईं रहेका छन् ।
प्रकाशित मिति: १७ पुस २०८२, बिहिबार
प्रतिक्रिया