काठमाडौं । नेपाली कम्युनिस्ट पार्टी (नेकपा)ले राष्ट्रिय सभामा आफ्नो शक्ति अनुसार तीन प्रमुख दल—नेपाली कांग्रेस र नेकपा (एमाले)सँग सहमति गरेर सिट बाँडफाँट गर्ने प्रयास गर्ने निर्णय गरेको छ।
मंगलबार साँझ सम्पन्न पार्टी नेताहरूबीचको परामर्श बैठकले राष्ट्रिय सभामा तीन प्रमुख दलबीच सहमति गरेर अघि बढ्ने विषयमा नेकपा प्रयासरत रहने कुरा तय गरेको नेता झलनाथ खनालले बताएका छन्।
खनालले भने, “राष्ट्रिय सभामा प्रत्येक दलको शक्ति अनुसार सिट बाँडफाँट गर्ने सहमति गर्ने प्रयास गर्ने निर्णय भएको छ। हाम्रो पार्टीको शक्ति कति छ भन्ने आधारमा सहमति गर्न खोज्ने योजना बनाइएको छ।”
यसअघि कांग्रेस र एमालेसँग नेकपाले छलफल गरेको भए पनि मनोनयन दर्ताको दिनसम्म सहमति हुन सकेको थिएन। संयोजक प्रचण्डका स्वकीय सहायक गोविन्द आचार्यका अनुसार, “मतभारअनुसार तालमेल गर्ने हाम्रो प्रस्ताव थियो, तर अहिलेसम्म कुनै समझदारी भएको छैन। नेकपाले आफ्नै उम्मेदवारी दर्ता गर्ने तयारी गरिरहेको छ। हामी तलबाट सिफारिस भएका नामहरूको टुंगो लगाउनेछौँ।”
राष्ट्रिय सभा निर्वाचनका लागि बुधबार बिहान १० बजेदेखि दिउँसो ३ बजेसम्म उम्मेदवारको मनोनयन दर्ता गरिने कार्यक्रम छ। यदि सहमति नभए, एमाले र कांग्रेसबीच गठबन्धन हुने सम्भावना छ।
राष्ट्रिय सभामा हाल १८ रिक्त सिटमध्ये, दुई दलबीचको सम्भावित गठबन्धन अनुसार कांग्रेसले १० सिट र एमालेले ८ सिट पाउने गरी बाँडफाँट तय भएको छ।
प्रकाशित मिति: २३ पुस २०८२, बुधबार
प्रतिक्रिया