७२ वर्षमा चलिराखेको छु, अझै केही वर्ष भिड्छु : प्रचण्ड

काठमाडौं । नेकपाका संयोजक पुष्पकमल दाहाल ‘प्रचण्ड’ले फागुन २१ को निर्वाचन असाधारण परिस्थितिमा हुँदै गरेको बताएका छन्।

नेकपाको निर्वाचन विशेष भेलालाई सम्बोधन गर्दै उनले यो निर्वाचन दुर्घटनाग्रस्त नेपाललाई बचाउने एउटा प्रयासको रूपमा आएको उल्लेख गरे।

प्रचण्डले भने, असाधारण परिस्थितिको, आकस्मिक ढङ्गले आइलागेको निर्वाचनमा हामी सहभागी हुँदै छौँ। त्यसैले यसलाई सामान्य अर्थमा बुझेर हुँदैन। निर्वाचनको बाटोबाट दुर्घटनाग्रस्त नेपाललाई बचाउने प्रयास स्वरूप यो निर्वाचन अगाडि आएको हो।

उनले सबै खाले प्रतिक्रियावादी, वैदेशिक चलखेल र षड्यन्त्रलाई परास्त गर्न नयाँ पहलकदमीको आवश्यकता महसुस गरी नेपाली कम्युनिस्ट पार्टी निर्माणको प्रक्रिया अघि बढाएको पनि बताए।

१०, १५ हुँदै आज २३ वटा कम्युनिस्ट र समाजवादी घटकलाई मिलाएर नयाँ राष्ट्रिय शक्ति निर्माण गर्ने सङ्कल्पका साथ हामी अघि बढेका छौँ। म ७२ वर्षको भए पनि अझै केही वर्ष सक्रिय रहिरहने छु। तपाईंहरू, विशेषगरी ४० वर्ष वरिपरिका साथीहरू, अवसर आउँदा सक्रिय रहनुहुनेछ, उनले भने।

प्रकाशित मिति: १७ माघ २०८२, शनिबार