काठमाडौं। अन्तर्राष्ट्रिय सञ्चारमाध्यम बीबीसी फारसीका अनुसार इरानको इस्फहान शहरका २१ वर्षीय ससान आजादवर जोंगानीलाई फाँसी दिइएको छ ।
उनीलाई यस वर्षको जनवरी महिनामा सरकार विरोधी प्रदर्शनका क्रममा पक्राउ गरिएको थियो ।
पछि उनलाई इस्फहानस्थित दस्तगार्ड जेलमा राखिएको थियो ।
मानव अधिकारसम्बन्धी संस्था एचआरएएनएलाई उद्धृत गर्दै उनको परिवारनिकट स्रोतले जनाएको अनुसार बिहीबार दिउँसो उनको अन्त्येष्टि गरिएको हो ।
अन्त्येष्टि “सुरक्षित क्षेत्र” मा गरिएको र केवल १० जना आफन्तलाई मात्र उपस्थित हुन अनुमति दिइएको बताइएको छ ।
इरानको न्यायपालिकाले जोंगानीमाथि प्रदर्शनका क्रममा सरकारी सुरक्षाकर्मी सवार सवारीसाधनमा ढुङ्गा र लाठी प्रहार गरेको, सवारीसाधनको सिसा फुटाएको तथा सुरक्षाकर्मीमाथि ढुङ्गा र इँटा प्रहार गरेको आरोप लगाएको छ ।
न्यायपालिकाका अनुसार उनले सरकार उल्ट्याउने उद्देश्यले प्रदर्शनमा सहभागी भएको र अरूलाई पनि आन्दोलनमा सहभागी हुन आह्वान गरेको स्वीकार गरेका थिए ।
तर मानव अधिकारकर्मीहरूले भने उनको हिरासत प्रक्रिया, कानुनी सहायता पहुँच र बयान लिने परिस्थितिबारे स्पष्टता नभएको भन्दै निष्पक्ष सुनुवाइ नभएको आशंका व्यक्त गरेका छन् ।
प्रकाशित मिति: १८ बैशाख २०८३, शुक्रबार
प्रतिक्रिया