काठमाडौं । बाँकेको नेपालगञ्ज उपमहानगरपालिका–१२, बेलासपुरमा एक युवकको हत्या आरोपमा प्रहरीले छ जनालाई पक्राउ गरेको छ।
जिल्ला प्रहरी कार्यालय, बाँकेका अनुसार पक्राउ पर्नेहरूमा कैलाली लम्कीचुहा–१ का १९ वर्षीय दीपेन्द्रराज गिरी, २० वर्षीय बीबीएस कुँवर, १८ वर्षीय सुशील खत्री, २० वर्षीय खकेन्द्र देवकोटा, कालीकोट पचालझरना–६ का १८ वर्षीय सन्तोष सन्ज्याल र सुर्खेतका २० वर्षीय रुपेश थापा रहेका छन्।
प्रहरीका अनुसार घटनामा संलग्न चार जनालाई बर्दिया ठाकुरबाबा नगरपालिकाबाट र दुई जनालाई नेपालगञ्जबाटै पक्राउ गरिएको हो। घटनास्थलबाट प्रहरीले एक थान चक्कु, सुपप्र ०१–०१४ प १२५६ नम्बरको एनएस २०० मोटरसाइकल तथा सिसाका बोतल बरामद गरेको छ।
प्रहरी नायब उपरीक्षक दीपक पातलीका अनुसार नेपालगञ्ज–१२ मा रहेको एक घरमा ब्रतबन्धको कार्यक्रमका क्रममा भएको विवाद उग्र बन्दा खजुरा गाउँपालिका–६ का २२ वर्षीय विशाल चन्द ठकुरीमाथि धारिलो हतियार प्रहार गरिएको थियो। गम्भीर घाइते ठकुरीको उपचारका क्रममा स्थानीय अस्पतालमा मृत्यु भएको प्रहरीले जनाएको छ।
प्रकाशित मिति: २३ बैशाख २०८३, बुधबार
प्रतिक्रिया