काठमाडौं । नेपाल विद्यार्थी सङ्घ (नेविसंघ) का निवर्तमान अध्यक्ष दुजाङ शेर्पाले राजनीतिक दलहरूले गरेका सबै नियुक्तिलाई बदनाम गर्ने गरी वर्तमान सरकारले गलत भाष्य निर्माण गर्न खोजेको आरोप लगाएका छन् ।
ललितपुरमा आयोजित एक कार्यक्रममा बोल्दै उनले प्रधानमन्त्री बालेन्द्र शाह नेतृत्वको सरकारले विगतका सरकारद्वारा गरिएका राजनीतिक नियुक्तिमाथि अविश्वास पैदा गर्न खोजेको टिप्पणी गरे ।
‘राजनीतिक दलहरूले नियुक्त गरेका सबै व्यक्ति खराब हुन्, उनीहरू पैसाको चलखेल गरेर पदमा पुगेका हुन् भन्ने सन्देश अहिले सुनियोजित रूपमा फैलाइँदैछ,’ शेर्पाले भने ।
उनले विगतका सरकारले गरेका नियुक्तिलाई आर्थिक लेनदेनसँग जोडेर प्रस्तुत गर्न खोजिएको भन्दै अर्थमन्त्री डा. स्वर्णिम वाग्लेमाथिसमेत प्रश्न उठाए ।
‘आज प्रधानमन्त्रीको मन्त्रिपरिषद्मा अर्थमन्त्रीका रूपमा स्वर्णिम वाग्ले हुनुहुन्छ । उहाँले स्पष्ट पार्नुपर्यो— राष्ट्रिय योजना आयोगको उपाध्यक्ष नियुक्त हुँदा कति रकम बुझाउनुभएको थियो ?’ उनले प्रश्न गरे ।
शेर्पाले थपे, ‘त्यतिबेला नेपाली कांग्रेसले उहाँलाई उहाँको विज्ञता र क्षमताका आधारमा विश्वास गरेर जिम्मेवारी दिएको थियो ।’
त्यसैगरी, उनले विद्यार्थी सङ्गठनहरू खारेज गर्ने सरकारी निर्णयप्रति कडा असन्तुष्टि जनाउँदै त्यसको प्रतिवादका लागि विद्यार्थीहरू एकजुट हुनुपर्ने बताए ।
प्रकाशित मिति: २४ बैशाख २०८३, बिहिबार
प्रतिक्रिया