काठमाडौं। नेकपा (एमाले) का अध्यक्ष केपी शर्मा ओलीले पार्टी नेतृत्व नछाड्ने संकेत गरेपछि उपमहासचिव योगेश भट्टराई ले सामाजिक सञ्जालमार्फत एक पुरानो कथा स्मरण गरेका छन्।
बुधबार आयोजित पार्टीको राष्ट्रिय कार्यशालामा अध्यक्ष केपी शर्मा ओली ले “शिर काटेर संगठन बलियो हुँदैन” भन्दै नेतृत्व परिवर्तनको बहसप्रति टिप्पणी गरेका थिए।
उनको उक्त अभिव्यक्तिलाई संकेत गर्दै भट्टराईले एमालेको सातौँ राष्ट्रिय महाधिवेशनमा सुनाइएको एक प्रसंग सार्वजनिक गरेका हुन्।
भट्टराईले उल्लेख गरेको कथाअनुसार एक वृद्ध व्यक्ति बसमा यात्रा गरिरहेका थिए।
यात्रा सकिएपछि उनले आफूकै कारण बसका सबै यात्रु सुरक्षित रहेको दाबी गरे।
यात्रुहरूले कारण सोध्दा उनले “पल्टिन लागेको बसलाई डन्डी समातेर जोगाएको” बताएका थिए।
सामाजिक सञ्जालमा उक्त कथा साझा गर्दै भट्टराईले आफूलाई अहिले त्यही प्रसंग निकै सम्झना आएको उल्लेख गरेका छन्।
यद्यपि उनले कसैको नाम नलिई कथा मात्र प्रस्तुत गरेका छन्।
एमालेभित्र नेतृत्व हस्तान्तरण र भावी नेतृत्वबारे विभिन्न तहमा बहस चलिरहेका बेला भट्टराईको यो टिप्पणीलाई राजनीतिक वृत्तमा अध्यक्ष ओलीको पछिल्लो अभिव्यक्तिप्रतिको सांकेतिक प्रतिक्रिया रूपमा हेरिएको छ।
प्रकाशित मिति: २० जेष्ठ २०८३, बुधबार
प्रतिक्रिया