काठमाडौं । हत्या आरोपमा जेलमा रहेका रेशम चौधरी जेलबाट छुटेका छन् ।
सरकारको सिफारिसमा राष्ट्रपति रामचन्द्र पौडेलले चौधरीको बाँकी कैद मिनाहा गरेपछि उनि विहान डिल्लीबजार कारागारबाट छुटेका हुन् । चौधरीलाई नागरिक उन्मुक्ती पार्टीका नेता कार्यकर्ताले फूलमालाले स्वागत गरेका छन् ।
चौधरी आजै गृह जिल्ला कैलाली जाने तयारीमा छन् ।
कैलालीको टीकापुरमा सात जना सुरक्षाकर्मी र एक नाबालक गरी आठ जनाको ज्यान गएको घटनामा तीनै तहका अदालतले चौधरीलाई जन्मकैदको सजाय सुनाएको थियाे ।
राष्ट्रपति रामचन्द्र पौडेलले नेपाल सरकारको सिफारिसबमोजिम टीकापुर हत्याकाण्डमा दोषी ठहरिएका रेशम चौधरीसहित १९ जनाको कैद सजाय माफी गरेका हुन् ।
नेपाल सरकार मन्त्रिपरिषद्को जेठ १२ र १४ गते बैठकको सिफारिसअनुसार पौडेलले सो निर्णय गरेको विज्ञप्तिमा उल्लेख छ । राष्ट्रपति कार्यालयद्वारा जारी विज्ञप्तिमा भनिएको छ— “टोपबहादुर बुढासमेतका १९ जना व्यक्तिहरूलाई विभिन्न अदालतबाट विभिन्न मितिमा भएका फैसलाबमोजिम लागेको कैद सजाय नेपालको संविधानको धारा २७६ र मुलुकी फौजदारी कार्यविधि संहिता, २०७४ को दफा १५९ बमोजिम गणतन्त्र दिवस, २०८० को उपलक्ष्यमा माफी भएको छ ।”
प्रकाशित मिति: १५ जेष्ठ २०८०, सोमबार
प्रतिक्रिया