काठमाडौं । नेपाली काङ्ग्रेसका सह-महामन्त्री महेन्द्र यादवमाथी खुकुरी प्रहार भएको छ। बालाजु बस्ने नुवाकोटको विदुर नगरपालिका वडा नम्बर ७ का श्यामबाबु सापकोटाले यादवमाथि बुधबार रिपोर्टस क्लबको कार्यक्रम सकिएपछि खुकुरी प्रहार गरेका हुन् ।
प्रहरीले सापकोटालाई पक्राउ गरी सिंहदरबार वृत्तमा ल्याएको छ । उनले रिस उठेपछि खुकुरी हानेको प्रहरीलाई बताएका छन् । सापकोटा पत्रकारकै भेषमा कार्यक्रममा पुगेको र साथमा खुकुरी लिएर गएको खुलेको छ ।
यादव रिपोर्टस क्लबमा बोलिसकेपछि राप्रपाका महामन्त्री धवलशमशेर जबरासँग कुरा गर्दै बाहिरिने क्रममा पिछा गरिरहेका सापकोटाले टाउकोमा खुकुरी प्रहार गरेको प्रहरीले जनाएको छ । करिब सवा १ बजेतिर सापकोटाले यादवमाथि खुकुरी प्रहार गरेका थिए ।
सापकोटाको प्रहारबाट यादवको टाउकोको पछाडिको भागमा चोट लागेको छ । उनको ट्रमा सेन्टरमा उपचार भइरहेको छ । प्रहरीले घटनाबारे अनुसन्धान भइरहेको जनाएको छ ।
प्रकाशित मिति: २० भाद्र २०८०, बुधबार
प्रतिक्रिया