काठमाडौं । पाल्पाको रैनादेवी छहरा गाउँपालिका २ सोमादीमा रहेको सीजी सिमेन्ट उद्योगमा स्थानीयले तालाबन्दी गरेका छन् ।
स्थानीय बासिन्दाले आफ्ना माग पूरा नगरेको भन्दै उद्योग प्रशासनमा शनिबार तालाबन्दी गरेका हुन।
धुलोधूवाँ गराएको, कम्पनीका कामदारले जथाभावी फोहोर गरेको, वातावरणीय प्रदूषण बढाएको आरोप लगाउँदै आफ्नो मागहरू पूरा नगरेकाले तालाबन्दी गरेको स्थानीय विजय ज्ञवालीले बताए ।
रैनादेवी छहरा गाउँपालिकाका २ वडाअध्यक्ष दानबहादुर पौडेल, स्थानीयबासिन्दा र कम्पनीका प्रतिनिधिबीच छलफल भइरहे पनि सहमति हुन नसक्दा स्थानीय युवाहरुले कार्यालयमा ताला लगाएका हुन् ।
सीजी सिमेन्टका प्रतिनिधि पदमबहादुर सिंहले अहिले सुरुवाती चरणका काम भइरहेकाले केही समस्या भएको बताउँदै केही समयमा नै प्राविधिकहरु बोलाएर समस्या समाधान गर्ने बताएका छन् ।
गाउँको शिक्षा, स्वास्थ्य र स्थानीयबासिन्दाको रोजगारीप्रति कम्पनी सचेत रहेको भन्दै उनले स्थानीय बासिन्दाकै सहयोगमा उद्योग चलाउन आफूहरु तयार रहेको बताएका छन् ।
प्रकाशित मिति: ८ पुस २०८०, आइतबार
प्रतिक्रिया