काठमाडौं – भारतको ओडिशास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयले नेपाली विद्यार्थीमाथि दुर्व्यवहार गर्दै जबर्जस्ती होस्टेलबाट निष्कासन गरेको छ।
विश्वविद्यालयमा अध्ययनरत एक नेपाली विद्यार्थीका अनुसार, प्रशासनको आदेशमा नेपाली विद्यार्थीहरूलाई बल प्रयोग गरी होस्टेलबाट बाहिर निकालिएको छ।
विद्यार्थीहरूले गम्भीर आरोप लगाउँदै भने, “हामीलाई जबरजस्ती कुटपिट गर्दै होस्टेलबाट निकालियो। करिब ७ देखि ८ सय नेपाली विद्यार्थीलाई विश्वविद्यालय प्रशासनले निष्कासन गरेको छ, साथै सबै नेपाली विद्यार्थीहरूको निलम्बन (सस्पेन्सन) गरिएको छ।”
यस घटनाको पृष्ठभूमिमा विश्वविद्यालयमा अध्ययनरत तेस्रो वर्षकी कम्प्युटर इन्जिनियरिङ्ग छात्रा प्रकृति लम्सालको होस्टेलको कोठामा आइतबार साँझ मृत अवस्थामा फेला परेको घटना रहेको छ।
प्राकृतिक संदिग्ध मृत्युपछि विश्वविद्यालयमा अध्ययनरत नेपाली विद्यार्थीहरू आन्दोलनरत बनेका थिए। विद्यार्थीहरूले निष्पक्ष छानबिन र न्यायको माग गरिरहेका थिए। तर, विश्वविद्यालय प्रशासनले उनीहरूको माग सम्बोधन गर्नुको सट्टा बल प्रयोग गर्दै जबर्जस्ती निष्कासन गरेको आरोप लागेको छ।
नेपाल सरकार र सम्बन्धित निकायहरूले यस घटनाप्रति गम्भीर ध्यान दिनुपर्ने आवश्यक देखिन्छ।
प्रकाशित मिति: ५ फाल्गुन २०८१, सोमबार
प्रतिक्रिया