काठमाडौं । नेपाल स्टक एक्सचेन्ज (नेप्से) का नवनियुक्त प्रमुख कार्यकारी अधिकृत (सीईओ) चुडामणि चापागाईंले नेप्सेमा विदेशी रणनीतिक साझेदार भित्र्याउने पहल गर्ने बताएका छन्। उनका अनुसार विदेशी साझेदारको आगमनले नेप्सेलाई प्रविधिगत रूपमा सशक्त बनाउन मद्दत गर्नेछ।
चापागाईंले प्रविधि सुधारलाई प्राथमिकतामा राखेको उल्लेख गर्दै भने, “हालको प्रविधिलाई स्तरोन्नति गर्न कठिन छैन। हामी प्रविधिलाई चुस्तदुरुस्त बनाउँदै, कारोबार प्रक्रियालाई अझ सहज र प्रभावकारी बनाउने छौं।”
संस्थागत सुशासन र पारदर्शिता प्रत्येक संस्थाका लागि अत्यावश्यक हुने भन्दै उनले नेप्सेमा यी विषयलाई विशेष प्राथमिकता दिने बताए। “सबैसँग सहकार्य गर्दै संस्थागत सुशासनलाई बलियो बनाउनेछु,” उनले थपे। साथै, लगानीकर्ताको सचेतना अभिवृद्धि गर्न विशेष पहल गरिने उनको भनाइ छ। “लगानीकर्ताको सुरक्षा र हितलाई केन्द्रमा राखेर आफ्नो भूमिका निर्वाह गर्नेछु,” उनले स्पष्ट पारे।
हालैका दिनहरूमा नेप्सेको पुनर्संरचनाको विषयमा व्यापक छलफल भइरहेको छ। यस सम्बन्धमा चापागाईंले पूर्ववर्ती प्रयासहरूको अध्ययन गरेर अगाडि बढ्ने योजना रहेको बताए। धितोपत्र बोर्डले नेप्सेको पुनर्संरचनाका लागि कार्ययोजना निर्माण गर्न एक कार्यदल गठन गरिसकेको छ, जसले हाल अध्ययन गरिरहेको छ। अध्ययन पश्चात्, कार्यदलले प्रतिवेदन बोर्डमा पेश गर्नेछ।
चापागाईंको नेतृत्वमा नेप्सेले आधुनिक प्रविधि, संस्थागत सुधार, पारदर्शिता, तथा लगानीकर्ताको हितलाई विशेष ध्यान दिने अपेक्षा गरिएको छ।
प्रकाशित मिति: १८ चैत्र २०८१, मंगलबार
प्रतिक्रिया