काठमाडौं— कोटेश्वरस्थित भाट भटेनी सुपरमार्केटमा राजावादी आन्दोलनको क्रममा भएको लुटपाट रोक्न सुरक्षा गार्ड डोरप्रसाद पराजुलीले देखाएको साहसिक कदमको उच्च सम्मान गर्दै उनलाई पाँच ग्रेड बढुवा र नगद पाँच लाख रुपैयाँ पुरस्कार प्रदान गरिएको छ।
चैत्र १५ गते भएको उक्त घटनामा पराजुलीले लुटपाटमा संलग्न व्यक्तिहरूमाथि कडाभन्दा कडा कारबाही गर्दै सुपरमार्केटको सुरक्षामा महत्वपूर्ण भूमिका निभाएका थिए। उनका साथै, अन्य सुरक्षागार्ड तथा कर्मचारीहरूलाई पनि भाट भटेनी सुपरमार्केटले सम्मान गर्दै प्रत्येकलाई २५ हजार रुपैयाँ नगद पुरस्कार तथा एक ग्रेड बढुवा प्रदान गरेको छ।
लुटपाटका क्रममा पराजुलीले दर्जनौँ हमलाकारीहरूलाई लाठी प्रयोग गरी खेदेको भिडियो सामाजिक सञ्जालमा तीव्र रूपमा भाइरल भइरहेको छ। सोही घटनामा उनले देखाएको बहादुरीका कारण धेरैले उनको प्रसंसा गरिरहेका छन्।
सुपरमार्केटका सञ्चालक मिनबहादुर गुरुङका अनुसार उक्त लुटपाट र तोडफोडका कारण कम्तीमा ७५ लाख रुपैयाँ बराबरको क्षति भएको छ। त्यसक्रममा सुरक्षागार्डहरू अग्रपंक्तिमा खटिएर आफ्नो कर्तव्य निर्वाह गरिरहेका थिए भने, अन्य कर्मचारीहरू रातभर मर्मत कार्यमा जुटेर व्यापारलाई निरन्तरता दिन लागिपरेका थिए।
साहस, निष्ठा र जिम्मेवारीबोधको उत्कृष्ट उदाहरण प्रस्तुत गरेका सुरक्षागार्डहरूलाई सम्मान गर्दै भाट भटेनी सुपरमार्केटले उनीहरूलाई हौसला प्रदान गरेको छ।
प्रकाशित मिति: १९ चैत्र २०८१, बुधबार
प्रतिक्रिया