काठमाडौं । नेपाल कम्युनिष्ट पार्टीका प्रवक्ता खड्गबहादुर विश्वकर्मा ‘प्रकाण्ड’ ले राजावादीहरु र पूर्वराजा ज्ञानेन्द्र शाहले देशलाई फेरि द्वन्द्वमा धकेल्न चाहेको बताएका छन् । हिजो (मंगलबार) प्राइम टाइम्स टेलिभिजनको जनता जान्न चाहन्छन् कार्यक्रममा पत्रकार ऋषि धमलासँग संवाद गर्दै उनले राजावादीहरु र पूर्वराजा ज्ञानेन्द्रबाट देशलाई द्वन्द्वतिर जानबाट रोक्नका लागि सबै राजनीतिक दल एक हुनु्पर्ने बताए ।
‘अहिले राजावादीहरु र ज्ञानेन्द्र शाहले गणतन्त्रको खिलाफमा हर्कत गरिरहेका छन्, गतिविधि गरिराखेका छन् । यसले के देखाउँदै छ भने देशलाई फेरि द्वन्द्वतिर धकेलिँदैछ । हामीले विचार गरिराख्ने कुरा नेपालका राजनीति पार्टी हामी नेपाल कम्युनिष्ट पार्टी पनि, विगतमा १० वर्ष जनयुद्ध सञ्चालन गरेका नेताहरु पनि हामी धेरै सिरियस छौं । ज्ञानेन्द्र शाह र प्रतिगामीहरुको कारणले गर्दा देश त फेरि द्वन्द्वमा जाँदैछ । उनीहरुले द्वन्द्वमा लाँदैछन् । देशलाई द्वन्द्वबाट बचाउनका निम्ति सबै राजनीतिक दल एक हुनुपर्छ,’– उनले भने ।
साथै, देशमा संघीय लोकतान्त्रिक गणतन्त्र स्थापना हुनुमा राष्ट्रिय स्वतन्त्र पार्टी (रास्वपा) को कुनै योगदान नरहेको र उसलाई यो व्यवस्थाको माया पनि नरहेको नेता प्रकाण्डको आरोप छ । ‘जसले गणतन्त्रको निम्ति फुटेको कौडी बराबर काम गरेको छैन, उसलाई के माया र मोह हुन्छ र ? बच्चाको सबैभन्दा बढी माया आमालाई हुन्छ । जसले गर्भधारण भएबाट नौ महिना बोक्छ, त्यसपछि जीवनमरणको संघर्षबाट बच्चा जन्माउँछ । बुबा र आमालाई तुलना गर्नुभयो भने बुबाभन्दा आमाको बढी माया हुन्छ । यही कुरा राजनीतिमा पनि लागू हुन्छ,’– उनले भने ।
गणतन्त्रको विरोधीहरु विदेशी दलाल र सामन्तवादी रहेको उनको आरोप छ । गत चैत १५ गते काठमाडौंमा भएको हिंसात्मक घटनाको डिजाइनर पूर्वराजा ज्ञानेन्द्र नै रहेको उनले बताए ।
- रिपोर्टस नेपाल
प्रकाशित मिति: १९ चैत्र २०८१, बुधबार
प्रतिक्रिया