झापा । नेपाल कम्युनिष्ट पार्टी (माओवादी केन्द्र) का वरिष्ठ नेता तथा पूर्वमन्त्री सुदन किरातीले केपी शर्मा ओली नेतृत्वको वर्तमान सरकार गम्भीर संकटमा परेको बेला दुर्गा प्रसाईंले ‘अक्सिजन’ प्रदान गरेको बताएका छन्।
झापाको बुद्धशान्ति गाउँ कमिटीको दोस्रो अधिवेशनको उद्घाटन समारोहमा सम्बोधन गर्दै किरातीले सरकार भत्किनै लागेको अवस्थामा प्रसाईंको गतिविधिले नयाँ ऊर्जा दिएको टिप्पणी गरे।
किरातीका अनुसार नेपाल विद्युत प्राधिकरणका तत्कालीन कार्यकारी निर्देशक कुलमान घिसिङलाई योजनाबद्ध रूपमा हटाएपछि सरकारले भ्रष्टाचार र अनियमितताको आरोप खेप्नुपरेको थियो। यसै कारण, सरकार चौतर्फी दबाबमा परेको र ढल्ने अवस्थामा पुगेको उनको भनाइ छ।
यसबाहेक, चैत्र १५ गते तिनकुनेमा राजावादी समूहले आयोजना गरेको प्रदर्शनलाई सरकार आफूमाथिको संकट मोड्न प्रयोग गर्न सफल भएको उनले दाबी गरे। उनले थपे, ‘मलाई लाग्छ, भित्रभित्रै केपी ओली सरकारले दुर्गा प्रसाईंलाई धन्यवाद दिएको छ।’
प्रकाशित मिति: १९ चैत्र २०८१, बुधबार
प्रतिक्रिया